ŞARA: KURD YEK JI PÊKHATINÊN BINGEHÎN ÊN SÛRIYEYÊ NE, DIVÊ JI PEVÇÛNÊN NÛ DÛR BIMÎNIN

Serokkomarê Sûriyeyê Ahmed eş-Şara di hevpeyvînek bi televîzyona El Cezîre re li ser rewşa Kurdan li Sûriyeyê, pêvajoya bi Hêzên Sûriya Demokratîk (SDG) re, têkiliyên ewlehiyê bi Israîlê re, Libnan, Rûsya û pêşketinên herêmî axivî.

Şara diyar kir ku Kurd yek ji pêkhatinên bingehîn ên Sûriyeyê ne. Wî got mafên hemwelatiyê yên ku di serdema rejîma berê de ji Kurdan hatibûn standin, ji nû ve hatine vegerandin. Wî herwiha bîranîna nasandina mafên çandî û ragihandina Newrozê wek cejna fermî kir û got divê Kurdan û SDG’yê ji hev cuda were nirxandin.

Li gorî Şara, di bicihanîna peymanên bi SDG re carinan astengî derketine holê, lê mutabakata dawî bingehek bihêztir heye û pêvajoya bicihanînê didome. Wî got divê Sûriyeyan ji her vebijarkê ku welatê ber bi pevçûnên nû ve dibe dûr bimînin û her çareseriya ku şer asteng dike divê were piştgirîkirin.

Li ser aloziya di navbera Îran û Israîlê de, Şara hişyarî da ku ger alozî bi awayê niha bidome dikare bibe sedema şerekî herêmî. Wî got Sûriye dê li gorî biryarên hevpar ên Lîga Erebî tevbigere û parastina aramiya herêmî yek ji pêşîniyên sereke ye.

Şara diyar kir ku ewlehiya Libnanê rasterast bi ewlehiya Sûriyeyê ve girêdayî ye û her du welat berjewendiyên stratejîk ên hevpar hene. Wî got hikûmeta Libnanê bi armanca bihêzkirina aramiyê bi çareseriyan dixebite.

Wî herwiha got hebûna komên çekdar ên derveyî dewletê ji bo ewlehiya herêmê pirsgirêkek girîng e û biryarên şer û aştiyê tenê divê ji aliyê dewletan ve bêne dayîn. Li ser Hizbullahê axivî û got çareserî bi bihêzkirina sazîyên dewletê yên Libnanê pêk tê.

Li ser têkiliyên bi Israîlê re, Şara got ger rêkeftinên ewlehiyê serkeftî bibin, di pêşerojê de dikare pêvajoyeke firehtir a aştiyê dest pê bike. Lê wî bal kişand ku ev yek nayê wateya devberdana mafên Sûriyeyê li Girên Golanê.

Şara diyar kir ku di pêvajoya rakirina cezayên Amerîkayê de Donald Trump rolek girîng lîst û Suudi Erebistan û Tirkiye jî navbeynkarî kirin. Wî got gelek ji van cezan ji ber kiryarên rejîma berê hatibûn sepandin û divê Sûriya nû bi wan cezayan re neyê cezakirin.

Li ser Rûsyayê jî got ku têkiliyên her du welatan li ser bingeha berjewendiyên hevpar ji nû ve tên avakirin û got li ser bingehên leşkerî hîn jî danûstandin didomin.

Şara got têkiliyên bi Iraqê re baş dibin û welatên Kendavê ji bo avakirina nû ya Sûriyeyê amade ne. Wî herwiha got projeyên di warê enerjî, geştûger, avahî û veguhastinê de tên amadekirin.

Di dawiyê de Şara got Sûriye dê modeleke siyasî ya li gor şert û mercên xwe ava bike û gel divê di hilbijartina rêveberan û amadekirina yasayan de roleke rasterast hebe.