DAYIKÊN AŞTIYÊ DI 1’Ê MÎHDARÊ DE LI ENQEREYÊ ÇADIRÊ DÊNIN Û ÇAVDÊRIYA AŞTIYÊ BIKIN

Meclisa Dayikên Aştiyê dê di 1’ê Mijdarê de ji bo daxwaza gavên di Pêvajoya Aştî û Civaka Demokratîk de û kişandina balê ser rewşa girtiyên di girtîgehan de, here Enqereyê, çadirê rake û çavdêriya “Nobeta Aştiyê” bike. Dayikên Aştiyê plan dikin ku bi partiyên siyasî re hevdîtinan bikin û daxwazên xwe ragihînin.

Nezahat Teke, endama Meclisa Dayikên Aştiyê, di daxuyaniyeke li Şaxa Amedê ya Komeleya Mafên Mirovan (İHD) de got ku bangawaziya Önder Apo ya di 27ê Sibatê 2025’an de ji wan re hêvî çêkiriye. Teke tekez kir ku ji bo pêşketina pêvajoyê, divê dewlet jî gavên berbiçav bavêje.

Teke got ku daxwaza wan a herî pêşî azadiya Önder Apo ye û wiha got: “Heke azadî tune be, qanûna ku dê derkeve jî bêwate ye.”

DAYIKÊN AŞTIYÊ JI 24 BAJARAN LI ENQEREYÊ DICIVIN

Nezahat Teke ragihand ku meclisên Dayikên Aştiyê yên ku li 24 bajaran dixebitin, dê di 1’ê Mijdarê de li Enqereyê bicivin. Wê got ku dayik dê li paytextê bi partiyên siyasî re hevdîtinan bikin, çadirê rakin û çavdêriyê bikin. Teke diyar kir ku çalakiya wan dê heta roja Sêşemê bidome.

Teke bal kişand ser hebûna girtiyên nexweş di girtîgehan de û ser rewşa hin girtiyan ku dema înfaza wan dirêj kiriye. Wê got ku ew naxwazin ji girtîgehan cenaze derkevin.

“KESÊ KU ÇARESERÎ ÇÊDIKE, SEROKÊ GELÊ KURD E”

Nezahat Teke diyar kir ku divê Önder Apo di pêvajoyê de roleke çêtir û bi bandortir bilîze. Wê got ku ewê ji bo diyarkirina statûya Abdullah Öcalan, Serokê Gelê Kurd, û ji bo azadiya wî daxwaza gavên konkret bikin û ji bo vê yekê biçin Enqereyê.

Teke di daxuyaniya xwe de wiha got:

“Emê ji bo ku statûya Serokê Gelê Kurd Abdullah Öcalan were misoger kirin û gav bên avêtin, bixebitin. Heke Serokê Gelê Kurd di nav komîsyonên hatine avakirin de bûya, pêvajoyê dê baştir bimeşiya. Ji bo vê yekê emê biçin Enqereyê. Emê daxwazên xwe bigihînin partiyên siyasî. Emê heta roja Sêşemê li wir bimînin.

Em bang li rêxistinên civaka sivîl ên li Enqereyê jî dikin ku piştgiriyê bidin dayikan û wan bêpar nehiştin. Îro her kesek ji bo aştiyê xwedî gotinekê ye. Divê ew jî piştgiriya dayikan bikin. Daxwaza me ya herî mezin azadî û statûya Rêbertiyê ye. Her du meh carekê hevdîtin pêk tên, ev ne bes e. Kesê ku dê çareseriyê hilberîne, Serokê Gelê Kurd e. Emê dosye, daxwaz û nîqaşên xwe li Enqereyê ragihînin. Hêvîdar in ku ewê me qebûl bikin û destên me vala nehiştin.”

Nezahat Teke di dawiyê de bang li saziyên çapemeniyê kir ku ji zimanê dijî aştiyê dûr bikevin.