TÜLAY HATİMOĞULLARI: DIVÊ ELEWÎ BIBIN XWEDIYÊ ROLA BINGEHÎN DI PÊVAJOYA AŞTIYÊ DE

Hevseroka Giştî ya Partiya DEM’ê Tülay Hatimoğulları li Stenbolê bi nûnerên komeley û rêxistinên Elewiyan re civiya û got ku divê Elewî rasterast beşdarî pêvajoya aştiyê bibin. Hatimoğulları, ku bang li dabînkirina garantiyên qanûnî û hiqûqî ji bo hemwelatiya wekhev kir, bal kişand ser pêwîstiya parastina mafê perwerdehiya bi zimanê zikmakî û demokratîkkirina Komarê.

Tülay Hatimoğulları li Cemeviya Kazım Karabekir a li navçeya Ümraniye ya Stenbolê bi nûnerên komeley û rêxistinên Elewiyan re civiya. Di civînê de mijarên pêvajoya aştiyê, hemwelatiya wekhev, perwerde û demokratîkbûnê hatin nîqaşkirin.

Hatimoğulları nerazîbûna xwe ji ber ku Elewî li Meclîsê nayên guhdarkirin nîşan da û got ku bêyî beşdariya Elewiyan pêvajoya aştiyê nikare pêş bikeve. Wê diyar kir ku divê aşîtî pêvajoyeke bêyî serketî û winda, ku jiyana hevbeş bingeh digire, be. Hatimoğulları tekez kir ku Elewî divê ne tenê temaşevanên pêvajoyê bin, lê rasterast bibin xwediyê rola bingehîn di wê pêvajoyê de.

Hatimoğulları her wiha fikarên xwe yên derbarê zext, sansûr û tayînkirina kayyuman li Tirkiyeyê anî ziman. Wê got ku tevî rexne û pirsgirêkên heyî, avakirina aştiyê pêwîst e.

“NE BIRATÎYA UMMETÊ, LÊ BIRATIYÊ LI SER BINGEHÊ HEMWELATIYA WEKHEV”

Hatimoğulları diyar kir ku divê hemwelatiya wekhev xwedî statûyeke qanûnî bibe û wiha got:

“Pêwîstiya me bi biratiya ummetê nîne, me hewce bi biratiyekê heye ku li ser bingeha hemwelatiya wekhev be. Pêwîstiya me bi biratiyekê heye ku hemwelatiya wekhev û mafên wekhev tê de bin. Divê ev biratî bibe xwedî statûyeke qanûnî. Pêwîst e hemwelatiya wekhev di bin garantiyên hiqûqî de bê parastin. Dixwazim hûn bizanin ku nêzîkatiya me ya li hember pêvajoyê di vê çarçoveyê de ye.”

“DAXWAZÊN ELEWIYAN DAXWAZÊN BINGEHÎN ÊN ME NE”

Hatimoğulları bal kişand ser daxwazên Elewiyan ên derbarê pergala perwerdehiyê de û got ku divê perwerde li ser bingeheke zanistî be û mafê perwerdehiya bi zimanê zikmakî bê garantîkirin.

Wê diyar kir ku hemû pirsgirêk û daxwazên ku Elewiyan heta niha anîne ziman, ji bo wan jî mijarên bingehîn in û got: “Hemû pirsgirêkên ku canên me yên Elewî heta niha anîne ziman, pirsgirêkên bingehîn ên me ne; hemû daxwazên wan jî daxwazên bingehîn ên me ne.”

“DIVÊ KOMAR BIBE MALA HEVBEŞ A 86 MÎLYON HEMWELATIYAN”

Hatimoğulları tekez kir ku divê Komar bê demokratîkkirin û bang li avakirina Komareke demokratîk kir ku hemû hemwelatiyên welat di nav xwe de bigire.

Hatimoğulları got: “Îro tiştê ku li Tirkiyeyê herî zêde pêwîst e, demokratîkkirina Komarê û avakirina Komareke demokratîk e.”