TRUMP LI SÎSTEMA HILBIJARTINÊ YA AMERÎKAYÊ REXNEYÊN TUND KIR Û HİŞYARİYA EWLEHİYÊ DA

Serokê Dewletên Yekbûyî Donald Trump di axaftina xwe ya ji Gelê Amerîkayê re li Qesra Spî de rexneyên tund li ser sîstema hilbijartinê kir. Wî îdia kir ku belgeyên îstîxbaratê yên ku nepeniya wan hate rakirin, nîşan didin ku binesaziya hilbijartinê bi kêmasiyên mezin ên ewlehiyê re rû bi rû ye.

Trump got ku belgeyên ku bi raya giştî re hatine parvekirin nîşan didin ku sîstema hilbijartinê li hember êrîşên sîber, manipulasyon û destwerdanên derveyî gelek xeternak e. Wî her wiha îdia kir ku ev agahî bi salan ji gel û rayagiştî ve hatiye veşartin û di vê derbarê de rêveberiyên berê yên Joe Biden û Barack Obama rexne kir.

Di axaftina xwe de Trump îdia kir ku Çîn ji sala 2020’an vir ve gihîştiye daneyên nêzîkî 220 milyon hilbijêrên Amerîkî û ev yek yek ji mezintirîn şikestinên ewlehiya daneyan di dîroka Amerîkayê de ye.

Wî her wiha bi bingeha agahiyên FBI’yê îdia kir ku Çîn di hilbijartinên sala 2020’an de hewl daye ku ji bo Joe Biden dengnameyên neqanûnî amade bike. Trump di heman demê de got ku rêveberiya Çîn piştgirîya darayî daye hin rojnamevanên Amerîkî yên ku li dijî wî nûçe belav kirine.

Trump daxwaz kir ku Ofîsa Giştî ya Îstîxbaratê û CIA lêkolîn bikin ka çima ev agahî ji raya giştî veşartiye. Wî her wiha xwest ku li dijî berpirsan tedbîrên îdarî û qanûnî werin girtin.

Li gorî Trump, sîstema hilbijartinê ya niha bi awayekî cidî kêmasiyên ewlehiyê hene û welatên wekî Çîn, Rûsya, Îran, Koreya Bakur û hin komên ne-dewletî dikarin armanca binesaziya hilbijartinê bikin.

Trump bi referansa daneyên Wezareta Ewlehiya Navxweyî got ku di qeydên hilbijêran de nêzîkî 278 hezar kesên biyanî hene û pergala dengdan û jimartina dengan li hember êrîşên sîber û manipulasyonê vekirî ye.

Di dawiya axaftina xwe de, Trump ji Kongreyê xwest ku pêşniyara yasaya SAVE America Act zûtir qebûl bike. Ev pêşniyar pêşkêş dike ku di dema dengdanê de nîşandana nasnameyê bibe mecbûrî û dengdana bi postayê were sînordarkirin.