LI HERÊMA KURDISTANÊ HÊŞYARIYA DRON Û FUZEYAN: LI HEWLÊR, SILÊMANÎ Û HELEBCEYÊ DENGÊN TEQÎNAN HATIN BIHÎSTIN

Herêma Kurdistanê di sibehê zû de bû armanca êrîşên bi dron û fuzeyan. Li Hewlêrê êrîş bi pergala parastina asmanî hate astengkirin, lê li Silêmanî û Helebceyê jî dengên gelek teqînan hatin bihîstin.

Li gorî agahiyên destpêkê, zêdetirî pênc dron û fuze ber bi Hewlêrê ve hatin avêtin. Di vîdyoyên ku welatiyan belav kirin de tê dîtin ku pergalên parastina asmanî armancan berî ku bigihîjin cihê xwe di hewayê de têk dibin. Heta niha ji aliyê desthilatdarên fermî ve li ser windahiyên jiyanî an maddî daxuyaniyek nehatiye kirin.

Li Helebceyê jî gelek welatiyan ragihandin ku li derdora bajêr dengên peş peş ên teqînan bihîstine. Her çend sedema wan hîn fermî nehatiye eşkerekirin, lê tê texmînkirin ku bi êrîşên dronan re têkildar bin.

Ji Silêmaniyê hat ragihandin ku li herêma Zırgwêz agir derketiye. Li gorî agahiyên destpêkê, gengaz e ku cihên ku kampên partiyên Kurdên Rojhilatê lê hene hatine bombebarankirin.

Her wiha hate gotin ku dengên teqînan ne ji navenda bajarê Silêmaniyê, lê ji rojhilatê bajêr û derdora cihên leşkerî û siyasî hatine bihîstin.

Welatiyên li Silêmanî, Helebce û Şarezorê jî piştrast kirin ku di demên cuda de zêdetirî pênc dengên teqînên tund bihîstine. Hîn jî li benda daxuyaniyên fermî li ser mezinahiya êrîşan dimînin.

Di herêmê de tedbîrên ewlehiyê hatine zêdekirin û rewşa hişyariyê berdewam dike.