SIRRI SAKIK: MIN JI ERDOĞAN RE PÊDIVIYA AVETINA GAVÊN KONKRET BO PÊVAJOYA AŞTIYÊ RAGIHAND

Parlamenterê DEM Partiyê yê Agiriyê Sırrı Sakık hûrguliyên civîna xwe ya bi Serokkomarê Tirkiyeyê Recep Tayyip Erdoğan re eşkere kir.

Sakik di daxuyaniya xwe de got ku di civînê de daxwaz û hêviyên gel li ser aştî, demokrasî û edaletê gihandine Erdoğan. Wî diyar kir ku pêvajoya “Civaka Demokratîk û Aştiyê” û gavên pêwîst ji bo pêşvebirina wê hate nîqaşkirin.

Wî got ku di civînê de bal kişand ser girîngiya nepaşxistina pêvajoyê û ragihand ku civak hêviyeke mezin li ser çareserkirina pirsgirêkan heye. Sakik got ku daxwazên kurdan yên ziman, çand û nasnameyê divê bi garantiyên yasayî û destûrî were parastin.

Her weha, wî pêşniyar kir ku mekanîzmayek nû ya diyalogê were avakirin ku hemû beşên civakê tê de cih bigirin, wek mînak modela Komîteya Mirovên Aqilmend a pêvajoya berê.

Sakik diyar kir ku derengxistina pêvajoyê dikare hêviyên civakê têk bibe û ji bo vê yekê gotina pêşiyan a kurdî “Av di golê de bimîne genî dibe” ji Erdoğan re anî ziman.

Di civînê de rewşa Selahattin Demirtaş jî hate nîqaşkirin. Sakik got ku biryarên Dadgeha Mafên Mirovan a Ewropayê û Dadgeha Destûrî divê werin sepandin û Demirtaş dikare di pêvajoya aştiyê de roleke girîng bilîze.

Sakik her weha pêşniyar kir ku Meclîsa Tirkiyeyê di havînê de jî karê xwe berdewam bike û ji bo çareserkirina pirsgirêka Kurd gavên konkret werin avêtin.

Wî got ku Erdoğan gelekî guhdarî kir û daxwaz û pêşniyarên wî hatin tomar kirin. Li gorî Sakik, Erdoğan jî girîngiya pêvajoyê piştrast kir û got ku divê ev pirsgirêk bi hev re were çareserkirin.

Sakik di civînê de her weha pirsgirêkên aborî û civakî yên li Agirî û herêmê wek xizanî, bêkarî, koçberî û pirsgirêkên tenduristiyê jî anîn rojevê.