LI ZONGULDAKÊ ÊRÎŞ LI SER KARKERÊN KURD

Hat ragihandin ku zêdetirî 70 karker û malbatên wan ên ji Şirnexê ji bo karê fındiqê ya demsalî çûne Zonguldakê, di nav du rojan de du caran rastî êrîşê hatine. Parlamenterên DEM Partiyê bang li rayedarên têkildar kirin ku ewlehiya jiyana karkeran were misoger kirin û ragihandin ku li ser êrîşê pêvajoya dadrêsî hatiye destpêkirin.

Zêdetirî 70 karker û malbatên wan ên ji navçeyên Cizîr û Silopiyê yên Şirnexê ji bo karê fındiqê ya demsalî çûne gundê Bektaşlı yê girêdayî navçeya Alaplı ya Zonguldakê, hat ragihandin ku du roj in rastî êrîşan tên.

Parlamenterên DEM Partiyê yên Şirnexê li ser wêneyên ku li medyaya civakî belav bûn û fikarên ku di raya giştî de çêbûn daxuyaniyek dan. Parlamenteran got ku agahiya êrîşa li ser karkeran roja borî gihiştiye wan û piştî ku karker vê sibehê bi partiyê re têkilî danî, bi Walîtiya Zonguldakê û Kaymakamtiya Alapliyê re hevdîtin hatin kirin.

DU CAREN RASTÎ ÊRÎŞÊ HATIN

Hat ragihandin ku di hevdîtinan de hate gotin ku jandarma destwerdana êrîşê kiriye û ewlehiya karkeran hatiye misoger kirin. Lê hate gotin ku karker di saetên êvarê de, dema ji zeviyê vedigeriyan, dîsa rastî êrîşê hatin.

Di daxuyaniyê de hate diyarkirin ku li gorî wêneyên belavbûyî, tevî ku jandarma li cihê bûyerê hebû, nekarî pêşî li êrîşê bigire. Piştî vê yekê bi Kaymakamê Alapliyê re dîsa hate axaftin û hat destnîşankirin ku ewlehiya jiyana zêdetirî 70 karker û malbatên wan divê yekser û bi awayekî bibandor were misoger kirin.

Hat ragihandin ku Kaymakamtiyê ji bo veguhestina malbatan bo cihê ewle yê li nêzîkî an jî ji bo girtina tedbîrên ewlehiyê li cihê ku lê ne, xebatan dide meşandin.

PÊVAJOYA DADRÊSÎ HATIYE DESTPÊKIRIN

Di daxuyaniyê de hate ragihandin ku li ser êrîşê ji aliyê Serdozanîya Giştî ya Alapliyê ve pêvajoya dadrêsî hatiye destpêkirin.

Di daxuyaniyê de hate gotin ku karkerên çandiniyê yên demsalî ji bo dabînkirina debara xwe ji sed hezaran kîlometre dûr hatine Zonguldakê û hate diyarkirin ku “ewlehiya jiyana gelê me berpirsiyariya rayedarên giştî ye”.

Parlamenterên DEM Partiyê diyar kirin ku ew ê pêvajoyê bişopînin da ku ewlehiya jiyana karker û malbatên wan were misoger kirin, êrîş bi hemû aliyên xwe ve were lêkolînkirin û rê li ber dubarebûna êrîşên bi vî rengî were girtin.