HPG: MÎRASA ŞEHÎDÊN ME LI BIR Û DILÊ ME HATIYE KAKILANDIN

Navenda Ragihandina HPG’ê, Kemal Pir, Mehmet Hayri Durmuş, Akif Yılmaz û Ali Çiçek, ku di meha Îlonê de salvegerên şehadeta wan in, bi rêz û hurmet bi bîr anî. HPG’ê diyar kir ku şehîd bi jiyana xwe, gotinên xwe û têkoşîna xwe rastiyeke mayînde di bîra gel de ava kirine û soza xwe ya xwedîderketina ser bîranîna wan û pêkanîna armancên wan dubare kir.

Di daxuyaniya HPG’ê de hate bibîrxistin ku Kemal Pir di 7ê Îlona 1982’an, Mehmet Hayri Durmuş di 12ê Îlona 1982’an, Akif Yılmaz di 15ê Îlona 1982’an û Ali Çiçek di 17ê Îlona 1982’an de jiyana xwe ji dest dane. Di daxuyaniyê de Şervanên Berxwedana 14ê Tîrmehê û hemû şehîdên têkoşînê bi hestên evîn, rêz û sipasê hatin bibîranîn.

HPG bal kişand ser merasîmên bîranîna şehîdan ku di van rojên dawî de li Bakurê Kurdistanê û bajarên cuda yên Tirkiyeyê bi beşdariya berfireh a gel hatin lidarxistin. HPG’ê diyar kir ku xwedîderketina gel li ser nirxên xwe nîşan dide ku bîranîna şehîdan di bîra civakî de zindî maye.

Di daxuyaniyê de ji malbatên şehîdan, Rêber Apo, kesên ku li ser şopa şehîdan dimeşin û hemû kesên ku bîranîna şehîdan zindî dihêlin re serxweşî hat xwestin.

“ŞEHÎDÊN ME RASTIYEKE MEZIN AFIRANDIN”

HPG’ê diyar kir ku jiyana û têkoşîna her şehîdekî mînakek e ku nîşan dide mirovê azad ne tenê ji bo çi divê bijî, lê çawa divê bijî.

Rêxistinê ragihand ku di demên berê de, ji ber şert û mercên şer û kêmbûna derfetên heyî, jiyana têkoşînê ya şehîdan bi hemû aliyên wê nehatiye belgekirin. HPG’ê ji ber kêmasiyên di vê mijarê de li hember şehîdan û gelê welatparêz xwe rexnekir û got ku di pêşerojê de dê xebatên bîranîna şehîdan, nasandin û domandina rêça têkoşîna wan bi awayên cuda bêne xurtkirin.

Di daxuyaniya HPG’ê de hate gotin: “Şehîdên me rastiyeke ewqas mezin afirandin ku her kêliya jiyana wan, her gotina wan û her helwesta wan di bîra me de hatiye kakilandin, di nasname û dilê me de cih girtiye.”

HPG’ê destnîşan kir ku mîrasa şehîdan yek ji çavkaniyên herî girîng ên moral û hêzê ye û ev mîras ji bo siberoja azad a gel jî wekî garantiyek tê dîtin.

HPG herwiha bang kir ku helwesta exlaqî, girêdana bi nirxan, têgihiştina jiyana komunal û xwefedaîya şehîdan ji bo têkoşîna azadiyê di jiyana rojane de were domandin. Ji hemû kesên ku li Bakurê Kurdistanê bi malbat, nêzîk, dua, peyam, piştgirî û kedê xwe beşdarî merasîmên bîranîna şehîdan bûn, sipas hat kirin.

RAMAZAN OSLO DI QEZA TRAFÎKÊ DE JIYANA XWE JI DEST DA

Di daxuyaniya HPG’ê de herwiha behsa qezayeke trafîkê ya ku di pêvajoya merasîmên bîranîna şehîdan de qewimî û xemgîniyek mezin afirand, hate kirin.

Hate ragihandin ku Ramazan Oslo, birayê şehîdên Arîn Goyî û Binevş Oslo, dema ku li Manîsa dixebitî û ji bo beşdarbûna merasîma bîranînê ya li Qilebanê diçû, di 11ê Îlona 2026’an de di qezayeke trafîkê de jiyana xwe ji dest da. Di heman qezayê de, yek ji wan giran birîndar bû, bi tevahî çar kes jî birîndar bûn.

HPG’ê Ramazan Oslo bi rêz û hurmet bi bîr anî, ji malbata Oslo û eşîra Goyî re serxweşî xwest û ji birîndaran re jî saxiyeke lezgîn xwest.