KNK JI BO TEMSÎLKIRINA KURDAN LI BM’Ê LI BRUKSELÊ KONFERANSEKE NAVNETEWEYÎ LI DAR DIXE

Kongreya Neteweyî ya Kurdistanê (KNK), ji bo avakirina helwesteke hevpar û nexşeya rêya dîplomatîk li ser temsîlkirina gelê Kurd li ber Neteweyên Yekbûyî (BM), dê di 3’ê Cotmehê de li Brukselê konferansek navneteweyî li dar bixe.

Mijara temsîla Kurdên li qada navneteweyî, ji dema ku piştî Şerê Cîhanê yê Yekemîn Rojhilata Navîn ji nû ve hate şekildan ve yek ji pirsgirêkên bingehîn ên ku nehatiye çareserkirin e. Kurd ku nêzîkî sedsalekê ye di nav sînorên dewletên cuda de di rewşeke siyasî û hiqûqî ya parçebûyî de dijîn, di nav BM’ê de temsîla wan a rasterast tune ye.

Di vê pêvajoya ku hevsengiyên li Rojhilata Navîn ji nû ve tên şekildan û saziyên navneteweyî ji aliyê pêşketinên herêmî ve girîngtir dibin de, KNK mijara temsîla Kurd li ber BM’ê careke din dixe rojevê. Di konferansa li Brukselê de tê armanc kirin ku helwesteke hevpar li ser navê Kurdên bê avakirin, hevkariya neteweyî û navneteweyî bê xurtkirin û rêya dîplomatîk a bê şopandin bê diyarkirin.

Di 6 û 7’ê Hezîrana 2026’an de, di Kongreya Giştî ya 24’an a KNK’ê de mijara temsîla gelê Kurd li ber BM’ê bi awayekî berfireh hate nîqaşkirin û biryar hate dayîn ku ji bo Kurdên wek gelên din bên naskirin û di saziyên girêdayî BM’ê de bi statûya çavdêriyê bên temsîlkirin, serîlêdan bê kirin.

KNK: KURD DI SAZIYÊN NAVNETEWEYÎ DE NÊN TEMSÎLKIRIN

Di bangewaziya Encûmena Rêvebir a KNK’ê ya li ser konferansê de hate gotin ku tevî nifûsa Kurdistanê ya nêzîkî 60 milyonî, Kurd di saziyên navneteweyî de bi têra xwe nayên temsîlkirin. Di daxuyaniyê de bi taybetî hate destnîşankirin ku hema hema hemû netewe di BM’ê de tên temsîlkirin, lê gelê Kurd ne xwedî temsîliyeta xwe ya di vê avahiyê de ye.

KNK diyar kir ku ji ber vê yekê di Kongreya Giştî ya 24’an de biryara serîlêdanê ji BM’ê re girt û armanc ew e ku Kurd, mîna Filistîniyan, di saziyên girêdayî BM’ê de wek çavdêr bên temsîlkirin.

NAME JI SEKRETERÊ GIŞTÎ YÊ BM’Ê GUTERRES RE HAT ŞANDIN

KNK diyar kir ku di mijara temsîla Kurd li ber BM’ê de bi pisporan re civîn hatine lidarxistin û ji bo vê mijarê nameyek ji Sekreterê Giştî yê BM’ê António Guterres re hatiye şandin.

Lê li gorî KNK’ê, ev mijara berfireh tenê bi çend civîn an nameyan nayê çareserkirin. Di daxuyaniyê de hate gotin ku ji bo pêşxistina pêvajoyê, di nav partiyên siyasî, rêxistin, sazî, akademîsyen, pispor û beşên cuda yên civaka Kurdistanê de li asta neteweyî û navneteweyî hevkariya xurt pêwîst e.

KNK herwiha destnîşan kir ku bi civîn, çalakî û kampanyayên wek kampanyayên îmzeyan, divê gelê Kurd bi awayekî çalak beşdarî pêvajoyê bibe û bê tevgertin.

ROVIYA KONFERANSÊ: TEMSÎL LI BM’Ê

Di konferansê de ku bi sernavê “Roviya Konferansê: Temsîla Gelê Kurd li ber Neteweyên Yekbûyî” bê lidarxistin, tê armanc kirin ku li ser temsîla Kurd li BM’ê nêrîn û helwesteke hevpar a Kurdistanî bê avakirin. Di konferansê de tê plan kirin ku rewşa heyî bê nirxandin, helwesta hevpar ji hemû aliyan re bê ragihandin, raya giştî ya cîhanê bê agahdarkirin û bername û çalakiyên serdema pêş bêne diyarkirin.

Konferans dê di 3’ê Cotmeha 2026’an de li Kampusa Etterbeekê ya Vrije Universiteit Brussel (VUB), Gebouw Q, Aula QA – Nelson Mandela Hall, bê lidarxistin.

Bername dê di saet 10.00’an de bi vekirin û rêzgirtina ji bo kesên ku jiyana xwe ji dest dane dest pê bike. Piştî axaftina vekirinê, peyamên mêvanan, pêşkêşkirinên pisporan û axaftinên beşdaran dê bêne kirin. Di beşa dawî ya rojê de jî xebatên planê dê bêne meşandin û daxuyaniya encamê dê bê amadekirin.