HERÇEND PÊŞNIYARA YASAYA ÇARÇOVEYÎ WERE PÊŞKÊŞKIRIN JÎ, DIBE KU BÊ BER BI SALA NÛ YA YASADANANÊ VE

Tê payîn ku pêşniyara yasaya çarçoveyî ya ku di çarçoveya Pêvajoya Çareseriyê de hatiye amadekirin, piştî Zirveya NATO’yê ji Meclîsa Mezin a Tirkiyeyê re were pêşkêşkirin. Lê ji ber rojeva giran a Meclîsê, dibe ku nîqaşkirina wê bê berdan sala nû ya yasadananê.

Li gorî habera rojnameya Cumhuriyet, pêşniyara yasayê li gorî rapora komîsyona ku di nav Meclîsê de hate avakirin, bi piranî hatiye amadekirin. Tê gotin ku MHP û DEM Partî bang kirine ku ev rêzikname zû were bicihkirin û dê di demeke nêzîk de ji Serokatiya Meclîsê re were pêşkêşkirin.

Di kulîsên Meclîsê de tê gotin ku pêşkêşkirina pêşniyarê ne wateya destpêkirina bilez a pêvajoya yasadananê ye. Ji ber gelek pêşniyarên qanûnê yên ku li ber Genel Kurulê li bendê ne û rojeva pir tijî ye, dibe ku nîqaşkirinên wê bêne berdan sala nû ya yasadananê.

Li aliyê opozîsyonê, bi taybetî Partiya İYİ, amadekariya helwesteke dijwar li dijî vê rêziknameyê dike. Berpirsyarên partiyê dibêjin di destpêka pêvajoyê de hate gotin ku pêşî divê çekdan bi tevahî biqede û piştî wê rêziknameyên qanûnî werin amadekirin. Li gorî wan, niha anîna yasaya çarçoveyî berî qedandina vê pêvajoyê guherîneke girîng di salnameya ku berê hatibû ragihandin de ye.

Çavkaniyên Partiya İYİ dibêjin ku di destpêkê de şertê bingehîn çekdan bû, lê niha modela derxistina yasayê û şopandina pêvajoya çekdanê hatiye hilbijartin û ev her du nêzîkatî ji hev cuda ne.

Tê payîn ku piştî pêşkêşkirina pêşniyarê, ew yekem car ji komîsyona pispor re were şandin. Lê ji ber giraniya rojeva Meclîsê, tê texmînkirin ku nîqaşên li Genel Kurulê di sala nû ya yasadananê de zêdetir bimeşin.