GÜLİSTAN KOÇYİĞİT: MUXATABÊ SEREKE YÊ PÊVAJOYA AŞTIYÊ ABDULLAH ÖCALAN E

Hevseroka Koma DEM Partiyê û Parlamentera Mûşê Gülistan Kılıç Koçyiğit di derbarê mafê hêviyê, Pêvajoya Aştî û Civaka Demokratîk û nîqaşên qanûna çarçoveyê de axivî û got ku ji bo pêşveçûna pêvajoyê divê rêkûpêkên hiqûqî bêyî derengî werin bicihkirin.

Koçyiğit diyar kir ku biryara “mafê hêviyê” ya Dadgeha Mafên Mirovan a Ewropayê (AİHM) ya derbarê Abdullah Öcalan de divê were sepandin. Wê got ku Tirkiye wek welatekî ku beşdarê peymanên navneteweyî ye, divê gavên qanûnî yên pêwîst bavêje. Wê herwiha bal kişand ku mafê hêviyê ne tenê ji bo Öcalan, lê ji bo hemû girtiyên ku cezayê hepsa giran hatine dayîn jî mafekî gerdûnî ye.

Koçyiğit diyar kir ku Abdullah Öcalan di çareseriya demokratîk a pirsgirêka Kurd de muxatabê bingehîn e û şertên tenduristî, ewlehî û ragihandinê yên wî divê werin baştir kirin û bi qanûnê bên parastin.

Di derbarê qanûna çarçoveyê de, Koçyiğit got ku ev rêkûpêk ne guherandina destûrê ye, lê qanûnekî qonaxa derbasbûnê ye ku dikare rê li ber derbasbûna ji şer û pevçûnan ber bi siyaseta demokratîk ve veke. Wê got ku pêwîst e çarçoveyeke hiqûqî ya fireh were çêkirin ku beşdarbûna kesên çek danîn di jiyana siyasî û civakî de hêsan bike.

Koçyiğit got DEM Parti amadekariyên xwe qedandine, lê hukûmetê hîn taslağa xwe bi raya giştî an partiyên siyasî re parve nekiriye. Wê got ku divê di dema amadekirina taslağê de raman û nirxandinên Abdullah Öcalan jî werin girtin.

Wê diyar kir ku qanûna çarçoveyê divê rê li ber siyaseta demokratîk veke û şertên derbasbûna ji şer û tundûtûjiyê ber bi bingeha siyasî û hiqûqî ve amade bike.

Di derbarê biryara mutlaq butlanê ya li dijî CHP’yê de, Koçyiğit got ku tunekirina îradeya hilbijartî bi rêya dadgehê ne rast e û ev biryar hem li siyaseta demokratîk hem jî li baweriya civakî ya li ser pêvajoya aştiyê bandorê neyînî dike.

Wê got ku CHP di çareseriya demokratîk a pirsgirêka Kurd de rolek girîng heye û çareserî tenê di navbera hikûmet û DEM Partiyê de nayê pêkanîn, lê hewceyê lihevhatinek siyasî û civakî ya firehtir e.

Koçyiğit herwiha bal kişand ku pêvajoya aştiyê divê nebe qurbanê hesabên hilbijartinê û ev pirs mijarek dîrokî ye ku bi pêşeroja demokratîk a Tirkiyeyê re têkildar e.

Wê di dawiya axaftina xwe de got ku DEM Parti ji bo pêvajoya Aştî û Civaka Demokratîk bi hêztir û rêxistinkirîtir amade bibe, dê pêvajoyeke kongreyê ya berfireh pêk bîne.