SAKIKÊ DEM PARTIYÊ BI WEZÎR MURAT KURUM RE PIRSGIRÊKÊN RÊVEBERIYÊN HERÊMÎ AXIVÎN

Parlamenterê DEM Partiyê ji Agiriyê Sırrı Sakık li Enqereyê bi Wezîrê Jîngeh, Bajarvanî û Guhertina Avhewayê Murat Kurum re hevdîtinek pêk anî û li ser pirsgirêk û daxwazên şaredariyên Agirî û parêzgehên derdorê gotûbêj kir.

Di hevdîtinê de daxwazên şaredariyan, pêdiviyên binesaziyê û projeyên ku bi hev re dikarin bên meşandin hatin nirxandin.

Piştî hevdîtinê Murat Kurum di hesabê xwe yê torên civakî de got ku wan pêdivî û daxwazên Agirî û herêmên derdorê guhdarî kirine û bi rêya şêwir û hevkariya hevpar dê ji bo çareserkirina pirsgirêkên bajaran kar bidomînin.

Sırrı Sakık jî got ku hevdîtin bi awayekî erênî derbas bû û wan bi taybetî pirsgirêkên şaredariyên ku şert û îmkanên wan sînordar in bi berfirehî anîne rojevê.

Wî her wiha diyar kir ku nêzîkbûna avaker a di warê piştgirî û çareserkirina pirsgirêkên rêveberiyên herêmî de girîng dibîne û ji bo vê hevdîtina bi berhem ji Wezîr Murat Kurum re spasî kir.