QSD’Ê JI ŞAMÊ RE BERSIVA LI SER KAMPA HOLÊ: “JI BERPRSIYARIYÊ TÊ REVANDIN”

Suriye Demokratik Güçleri (QSD), li ser pêşveçûnên li Kampa Holê û daxuyaniyên Wezareta Hundir a Hikûmeta Demkî ya Sûriyeyê nivîsarek nirxandinê weşand. QSDê got ku gotinên axêverê wezaretê rastiyê nîşan nadin û hewl tê dayîn ku pirsgirêkên ewlehî û îdarî bên veşartin.

Di daxuyaniyê de ku ji aliyê Navenda Têkiliyên Çapemeniyê ya QSDê ve hat weşandin, bal kişand ser tevgera leşkerî û pevçûnên li derdora kampê. Hate gotin ku komên çekdar ên girêdayî Şamê êrîşên rasterast li bajarê Holê kirin, şandina hêzên leşkerî pêk anîn û pevçûn heta dîwarên kampê gihîştin. Di heman demê de, di hundirê kampê de jî tevgerên hevrêz ên ji aliyê malbatên endamên DAÎŞê ve hatin kirin ku armanca wan têkbirina ewlehiyê bû.

QSDê diyar kir ku li hember van pêşveçûnan, hêzên wan neçar man ji bo ku kamp nebe qada şerê vekirî, paşde vekişin. Hate bal kişandin ku ev paşvekişandin ne hilbijartinek bû, lê encama êrîşên rasterast bû.

Li gor daxuyaniyê, piştî vê yekê komên girêdayî Şamê ketin hundirê kampê. Tê îdîa kirin ku derxistina malbatên girêdayî DAÎŞê û revandina hin kesan piştî vê ketinê qewimî. Hat gotin ku van çalakiyan zêdetir ji hefteyekê berdewam kirin û di bin çavdêriya hêzên girêdayî Wezareta Parastin û Wezareta Hundir de pêk hatin. QSDê diyar kir ku ev rastî bi deng û wêne hatiye belgekirin.

Di daxuyaniyê de herwiha hate bîranîn ku Kampa Holê ji salan ve qada krîzeke ewlehî û mirovahî ya tevlihev e û QSDê di vê pêvajoyê de barê giran hilgirtiye. Hêzên wan got ku pêşî û paşî armanca wan parastina kampê û astengkirina nûve-avakirina şaneyên DAÎŞê ye.

QSDê gotinên axêverê Wezareta Hundir ya girêdayî Şamê wek “hewldanek siyasî ya ji bo şaşkirina raya giştî” binav kir û got ku berpirsiyariya valahiyên ewlehî û îdarî yên derketî piştî guhertina kontrolê nikare li ser wan were barkirin.