ÊRÎŞA BI DRAJOYÊN BÊMIROV LI BANDARGEHA BESRAYÊ: BARKIRINA PETROLÊ BI DEMEKÊ HAT RAWESTANDIN

Bandargeha Besrayê ku navenda herî mezin a derxistina petrolê ya Iraqê ye, piştî êrîşa bi dronê ket rewşa hişyariyê. Keştiyek petrolê ya ku li bandargê rawestiyabû hate armanckirin. Di êrîşê de kesek jiyana xwe ji dest neda, lê ji bo tedbîrên ewlehiyê barkirina petrola xav bi demekê hate rawestandin.

Li gorî çavkaniyên ewlehî û petrolê yên Iraqê, droneyek çekdar keştiya petrolê armanc kir û zirarek maddî lê çêbû. Berpirsyaran ragihand ku di bûyerê de tu windahiya jiyanê nehatiye tomarkirin.

Piştî êrîşê, desthilatdarên Iraqê tedbîrên ewlehiyê zêde kirin û barkirina petrola xav ji hemû rawestgehên Besrayê bi demekê sekinandin. Keştiya ku hate armanckirin jî ji qada bandargê hate derxistin.

Heta niha tu komek berpirsiyariya êrîşê negirtiye. Lê li derdora Bandargeha Besrayê, ku piraniya petrola Iraqê ji wir tê derxistin, tedbîrên ewlehiyê hatine xurtkirin.

Ev bûyer di dema ku aloziya di navbera Dewletên Yekbûyî û Îranê de dîsa bilind dibe pêk hat. Tevî peymana agirbest û muzakereyê ya ku di Hezîranê de hate îmzekirin, tevgerên leşkerî berdewam in. Îranê di rojên dawî de bi dronan êrîşên li ser cihên leşkerî yên Amerîkayê li Urdun, Kuweyt û Behreynê pêk anî.

Artêşa Kuweytê jî ragihand ku hêzên parastina asmanî êrîşên dronan yên ku ji Îranê hatine şandin asteng kirine.

Di aliyekî din de, axêverê Wezareta Karên Derve ya Îranê Îsmail Beqayî, êrîşa asmanî ya Amerîkayê ya li nêzî nexweşxaneyeke zarokan li başûrê rojhilatê welêt “êrîşeke hovane” binav kir. Wî got ku piştî êrîşê 211 zarokên ku kemoterapî werdigirtin bi lez hatin valakirin.