DI NÎQAŞÊN ENTEGRASYONÊ DE YPJ WEKE HÊZEK XWESER CIH DIGIRE

Fermandariya Yekîneyên Parastina Jin (YPJ) di daxuyaniya xwe ya derbarê pêşketinên dawî û pêvajoya nû de ragihand ku YPJ di nîqaş û nirxandinên derbarê pêvajoya entegrasyonê de wekî hêzek xweser û taybet cihê xwe digire.

Fermandariya YPJ’ê diyar kir ku wan di warê şerê li dijî terorê û parastina nirxên mirovî de xwedî dîrok û helwesteke girîng in. Her wiha, wan gelê xwe û raya giştî, bi taybetî, li ser pêşketinên dawî û pêvajoya nû agahdar kir.

Di daxuyaniyê de hate gotin ku di çarçoveya hewldanên ji bo misogerkirina îstîqrara herêmî û avakirina pêşerojeke ewle de, nîqaş û nirxandinên derbarê pêvajoya entegrasyonê de didomin. Hate tekez kirin ku YPJ di vê pêvajoyê de wekî hêzek xweser û taybet cihê xwe digire.

Di daxuyaniyê de bal kişand ser vê yekê ku YPJ tenê hêzeke leşkerî nîne, di heman demê de sembola îrade û kedê jinê ye. Ji ber vê yekê, li ser hûrguliyên beşdarbûnê û rola YPJ’ê di avahiya nû de, li ser bingeha parastina nasname, ezmûn û destkeftiyên jinan, nîqaşên berfireh didomin.

Fermandariya YPJ’ê tekez kir ku di her gavê de xeta bingehîn a wan parastina destkeftiyên gel û mafên rewa yên jinan e. Hat ragihandin ku encamên van nîqaşan dê di pêvajoya pêş de bi awayekî vekirî ji raya giştî re bêne ragihandin.