BANGAWAZ JI BO GORISTANA HILWEŞANDÎ YA GIMGIMÊ: ÇARENÛSA 27 CENAZEYAN BÊ RAGIHANDIN

Çarenûsa cenazeyên 27 endamên PKK’ê yên ku li Goristana Îsmail Ronahî ya li navçeya Gimgimê (Varto) ya Mûşê hatibûn veşartin, hîn jî nayê zanîn. Goristan deh sal berê hatibû bombebaran kirin û paşê hilweşandibûn. Hevserokê Navçeya Gimgimê ya Partiya Herêmên Demokratîk (DBP), Aziz Oral, xwest ku eşkere bê kirin cenaze li ku derê hatine birin û ji malbatên wan re bên radestkirin.

Piştî bidawîkirina pêvajoya diyalogê ya ku di navbera salên 2013-2015’an de di çarçoveya çareserkirina pirsgirêka Kurd de dimeşiya, goristan jî bûne yek ji armancên êrîşên ku li Kurdistanê dest pê kirin. Li navçeya Gimgimê ya Mûşê, ku şer û pevçûn lê zêde bûn, di 10’ê Tebaxa 2015’an de cenazeya bê can a endama YJA-Star’ê Kevser Eltürk (Ekin Wan) hate pêşandan. Di dema qedexeyên derketina derve yên ku di navbera 14-18’ê Tebaxê de hatibûn ragihandin de jî pismamên hev, Abdullah Toprak û Rahmi Kızıltaş, hatin kuştin.

Êrîş bi navenda navçeyê re nehatin sînordarkirin û ber bi herêmên gundewarî ve belav bûn. Di vê çarçoveyê de, Goristana Îsmail Ronahî ya li gundê Qolanê yê Gimgimê jî hate bombebarankirin. Pirtûkxane, mizgeft û cemeva ku di nav goristanê de bûn, hilweşandin. Di 11’ê Çileya 2018’an de leşker bi makîneyên xebatê ketin goristanê û wê hilweşandin. Ji wê demê ve agahî li ser çarenûsa cenazeyên 27 endamên PKK’ê nehatiye bidestxistin.

ÇARENÛSA CENAZEYAN BÊ RAGIHANDIN

Di goristanê de ku avahiyên olî jî lê hebûn, Gireboa, ku ji bo Elewiyan cihê pîroz e, jî cih digirt. Gireboa jî bû hedefa bombeyan. Weke hinceta bombebaranê hebûna çeperan li derdora goristanê hate pêşxistin.

Bi destpêkirina Pêvajoya Aştiyê û Civaka Demokratîk re, malbatan xwest ku cihê cenazeyên zarokên xwe yên di têkoşîna azadiyê de jiyana xwe ji dest dane û cihên gorên wan bên diyarkirin. Hevserokê DBP’ê yê navçeya Gimgimê, Aziz Oral, derbarê cenazeyên ku tê gotin ji goristanê hatine derxistin lê çarenûsa wan nayê zanîn de axivî û got ku radestkirina cenazeyan ji malbatan re yek ji pêwîstiyên aştiyê ye.

Oral anî bîra xwe ku di sala 2014’an de ji bo endamên PKK’ê yên jiyana xwe ji dest dabûn, “Bîrdariya Şehîdan” hatibû çêkirin. Wî got ku piştî bidawîkirina “pêvajoya çareseriyê”, goristan bi balafiran hate bombebarankirin. Oral diyar kir ku cenaze ji goristanê hatine derxistin, lê nayê zanîn ku li ku derê hatine birin. Wî got ku dibe ku hin cenaze jî biribin Kilyosê.

Oral wiha got: “Daxwaza me ev e ku bê eşkerekirin cenaze li ku derê hatine birin û li ku derê hatine veşartin, û ji malbatên wan re bên radestkirin. Di destpêkê de 4 şehîd hatin anîn. Paşê 17 cenaze hatin anîn. Hûn jî dibînin, kevirên gorên wan jî tune ne. Her tişt bûye xirabe. Em tiştên ku bi miriyên me re hatine kirin qebûl nakin. Mirovahî jî wan qebûl nake. Em li welatekî misilman dijîn. Em fam nakin çima divê ev zehmetî û êş li ser miriyên me were ferzkirin.”

‘CENAZE BÊN RADESTKIRIN’

Oral bal kişand ser Pêvajoya Aştiyê û Civaka Demokratîk û got ku heke aşitî were avakirin, divê her du alî li hev bibexşînin. Wî diyar kir ku malbat li benda cenazeyên xwe ne û bang li berpirsiyarên peywendîdar kir ku cihê cenazeyan eşkere bikin û wan ji malbatan re radest bikin.

Oral got: “Heke aştiyek hatibe danîn, divê her du alî li hev bibexşînin. Cenaze li ku ne? Bila ji malbatan re bên radestkirin da ku teselliyê bibînin. Malbat li benda cenazeyên xwe ne. Yên ku li vir hatibûn veşartin ne ji Vartoyê bûn. Kesên ji herêmên din hatibûn û li vir jiyana xwe ji dest dabûn, û kesên ku cenazeyên wan ji herêmên din anîbûn vê goristanê, di nav wan de hene. Heke berpirsiyar cenazeyan radest bikin, dilê malbatan dê hinekî rehet bibe.”

DERBARÊ HILWEŞANDINA GORISTANA ÎSMAÎL RONAHÎ DE

Di Goristana Îsmail Ronahî de endamên PKK’ê yên di pevçûnên salên 1990’î de jiyana xwe ji dest dabûn, hatibûn veşartin. Goristan, ku tê de gorên 27 kesan hebûn, di 10’ê Çileya 2018’an de hate bombebarankirin û cenazeyên di gorên wan de hatin birin. Çarenûsa cenazeyan heta niha jî nehatiye zelalkirin.

Şahidek ku di dema hilweşandina goristanê de ji Ajansa Mezopotamya (MA) re axivî, got ku şeva 10’ê Çileyê li gundê tevgereke leşkerî ya pir zêde hebû û hemû rêyên gund hatibûn girtin. Şahid got ku ber bi sibehê ve du kepçe û du kamyon li kêleka goristanê dîtine, û ambulansek jî li cihêkî dûrî goristanê sekinî bû.

Şahid diyar kir ku di navbera du rojan de hemû goristan hatibû hilweşandin û ax û bermahiyên wê jî ji wir hatibûn birin. Wî got ku nizane gelo cenaze ji goristanê hatine derxistin an na. Şahid her wiha got ku wî nedîtiye ku cenazeyekî bi ambulansê ve hatibe veguhestin û gihîştina wan a goristanê jî ne gengaz bû. Li gorî gotina wî, goristan di sala 2014’an de hatiye çêkirin.