DEM PARTÎ Û DBP AZADIYA RÊBER APO XWESTIN

Hevserokên Giştî yên DEM Partiyê, Tülay Hatimoğulları û Tuncer Bakırhan, û Partiya Herêmên Demokratîk (DBP), di daxuyaniyên xwe yên li ser salvegera komploya navneteweyî ya 9’ê Cotmehê de, tekez kirin ku divê Rêber Apo di şert û mercên azad de bijî û karên xwe bidomîne. Di daxuyaniyan de hate gotin ku azadiya Rêber Apo ji bo bidestxistina aştiyeke mayînde û vekirina rêya çareseriya demokratîk girîngiyeke dîrokî heye.

DBP’ê di daxuyaniya xwe ya li ser salvegera komploya navneteweyî de, ku di 9’ê Cotmeha 1998’an de bû sedema derketina Rêber Apo ji Sûriyê û paşê jî girtina wî, diyar kir ku ne tenê Rêber Apo bû armanc. Di daxuyaniyê de hate gotin ku hebûn û têkoşîna azadiyê ya gelê Kurd, îradeya gelan ji bo avakirina jiyaneke wekhev û azad û pêşeroja demokratîk a Rojhilata Navîn jî hatibûn hedefgirtin.

DBP’ê bal kişand ser vê yekê ku encamên komployê îro jî berdewam dikin. Partiyê diyar kir ku nêrîna ku dixwaze gelê Kurd sedsalek din bê statû bihêle, îradeya Rêber Apo ya çareseriya demokratîk bêbandor bike û pêşeroja hevpar a demokratîk a gelan asteng bike, bi awayên cuda hebûna xwe didomîne.

DBP’ê got ku gelê Kurd, bi mezin kirina têkoşîna xwe ya li dijî polîtîkayên înkar û tunekirinê yên zêdeyî sedsalekê dom kirine, îradeya xwe ya azadî, demokrasî û aştiyê parastiye. Partiyê tekez kir ku ev têkoşîn rê li ber Pêvajoya Aştî û Civaka Demokratîk vekiriye. Di daxuyaniyê de hate gotin ku divê hebûn û nasnameya gelê Kurd di destûrê de bê parastin, pirsgirêka Kurd bi rêbazên demokratîk û qanûnî bê çareserkirin û şert û mercên ku Rêber Apo bikaribe di azadî de bijî û bixebite bên afirandin.

DBP’ê diyar kir ku azadiya Rêber Apo tenê mijareke mafê kesekî nîne; ew ji bo vekirina rêya çareseriya demokratîk, avakirina aştiyeke mayînde û bi rûmet û ji bo ku gelên li Tirkiyeyê bikaribin pêşerojeke wekhev û azad bi hev re ava bikin, şertê bingehîn e. Di daxuyaniyê de bang li hemû gel, beşên civakê û hêzên demokratîk ên ku demokrasî, dad û aştiyê dixwazin hate kirin ku têkoşîna hevpar mezin bikin.

DBP’ê careke din diyar kir ku divê Rêber Apo, yê ku wekî mîmarê Pêvajoya Aştî û Civaka Demokratîk û tevî şert û mercên teng jî wekî pêşbirê wê tê naskirin, bikaribe di şertên azad de bijî û bixebite. Partiyê got ku dê ji bo çareseriya demokratîk û qanûnî ya pirsgirêka Kurd û avakirina pêşerojeke demokratîk a Tirkiyeyê têkoşîna xwe bidomîne.

HATİMOĞULLARI Û BAKIRHAN BANGA AZADIYÊ KIRIN

Hevseroka Giştî ya DEM Partiyê, Tülay Hatimoğulları, diyar kir ku komploya navneteweyî ya ku di 9’ê Cotmeha 1998’an de dest pê kir, dixwest bi hedefgirtina Abdullah Öcalan îradeya gelê Kurd bişkîne, pevçûna di navbera gelan de li Tirkiyeyê kûr bike û kaosa li Rojhilata Navîn zêdetir bike. Hatimoğulları got ku planê ku dixwest gelan li hemberî hev bide sekinandin, bi israra Öcalan a li ser aştiyê û çareseriya demokratîk, tevî şertên herî giran ên tecrîdê, têk çû.

Hatimoğulları diyar kir ku Pêvajoya Aştî û Civaka Demokratîk, ku bi bangewaziya 27’ê Sibatê dest pê kir, careke din girîngiya hewldanên aştiyê û îradeya çareseriya demokratîk a Öcalan a ku salan e didomîne, derxistiye holê. Wê got ku ev pêvajo ji bo jiyana hevpar a wekhev û azad a gelan derfeteke girîng afirandiye. Hatimoğulları tekez kir ku ji bo serkeftina pêvajoyê divê rê li ber xebatkirina Öcalan di şertên azad de û têkiliya wî bi civakê re bê vekirin, herwiha danûstandin di şertên wekhev de bên meşandin. Wê bang kir ku li dijî komploya navneteweyî pêşerojeke wekhev, dadmend û demokratîk bi hev re bê avakirin.

Hevserokê Giştî yê DEM Partiyê, Tuncer Bakırhan, jî diyar kir ku armanca komployê lawazkirina îradeya gelan a ji bo jiyana hevpar û ji nû ve şekildana pêşeroja herêmê bi kûrkirina pevçûnê bû. Wî di salvegerê de komployê careke din şermezar kir.

Bakırhan got ku Öcalan 27 sal in li Îmraliyê nêzîkatiya çareseriya demokratîk pêş dixe û parastina jiyana hevpar a gelên Kurd û Tirk li ser bingeha demokratîkbûnê û ramana “Komara Demokratîk” dike. Wî diyar kir ku îro qonaxeke nû dest pê kiriye ku tê de li şûna pevçûnê li ser aştiyê û civaka demokratîk tê axaftin. Bakırhan got ku veguherîna vê qonaxê bo aştiyeke mayînde girêdayî wê ye ku Öcalan bikaribe di şertên azad de bixebite û ramanên xwe bigihîne civakê.

Bakırhan tekez kir ku Kurd, Tirk û hemû gelên li Tirkiyeyê dikarin pêşerojeke wekhev û azad bi hev re ava bikin.