DAXUYANIYA ORTEGA YA “ÊDÎ HILBIJARTIN TUNE YE” RASTÎ BERTEKA SERT A AMERÎKAYÊ HAT

Daxuyaniya Serokê Dewleta Nîkaraguayê Daniel Ortega ya ku got “li welat êdî hilbijartin nayên kirin” di raya giştî ya navneteweyî de nîqaşek berfireh derxist. Rêveberiya Amerîkayê ev gotin wekî dijî prensîbên demokrasiyê nirxand, di dema ku opozîsyona Nîkaraguayê jî vê daxuyaniyê wekî ragihandina fermî ya rêveberiya yek-partiyê binav kir.

Di daxuyaniya ku ji aliyê Wezîrê Karên Derve yê Amerîkayê Marco Rubio ve hate weşandin de hat gotin ku gotinên Ortega yên derbarê bidawîkirina hilbijartinan de rastiya rejîma otorîter ya wî eşkere dike. Rubio bal kişand ser girîngiya hilbijartinên azad û dadperwer û got ku mafê gelê Nîkaraguayê yê diyarkirina îradeya siyasî divê were parastin.

Daniel Ortega di merasîma 47’emîn salvegera Şoreşa Sandinîst de li Managua de Amerîka bi destwerdana karûbarên navxweyî yên welatê xwe tawanbar kir. Wî got ku destûr nadin ku bi rêya hilbijartinan desthilat were guhertin û diyar kir: “Li vir êdî tu hilbijartinên ku bi wan bikarin desthilatê bigirin nayên kirin.”

Ortega opozîsyonê jî bi piştgirîkirina darbe û hevkariya bi hêzên derveyî tawanbar kir û got ku hikûmeta wî serweriya welêt diparêze.

Di aliyê din de, siyasetmedarên opozîsyonê Felix Maradiaga Saenz û Juan Sebastian Chamorro gotin ku daxuyaniya Ortega ragihandina fermî ya rêveberiya yek-partiyê ye. Wan hişyarî dan ku rakirina pergala hilbijartinan dê hukûqa serdest û mafên bingehîn ên siyasî zêde zirar bide.

Daniel Ortega, yek ji rêberên sereke yên Şoreşa Sandinîst a sala 1979’an e. Ew di navbera salên 1985-1990’an de serokwezîr bû û ji sala 2007’an ve careke din desthilatê digire.

Di salên dawî de rêveberiya Ortega ji ber zextên li dijî siyasetmedarên opozîsyonê, rojnamevanan, parêzvanên mafên mirovan, akademîsyenan û saziyên civaka sivîl rexneyên navneteweyî yên zêde wergirtiye. Komên pisporên Neteweyên Yekbûyî jî di raporên xwe de ev polîtîkayên hikûmetê wekî zextên sîstematîk nirxandin, lê hikûmeta Nîkaraguayê van rexneyan red kir û ew wekî destwerdana serweriya welêt binav kir.