YEKEM KAFILA KOÇBERÊN EFRÎNÊ GIHÎŞT MALBATÊN XWE

Piştî 8 salên koça bi zorê, yekem kafila koçberên Efrînê gihîşt welatê xwe. Sedan malbat ku ji herêma Cizîrê ketibûn rê, di demên sibehê yên zû de gihîştin Efrînê û ji aliyê gelê bajêr ve bi awayekî girseyî hatin pêşwazî kirin.

Di çarçoveya pêvajoya vegerê ya ku li gorî peymana ku di 29ê Çile de di navbera Hêzên Sûriya Demokratîk (QSD) û hikûmeta demkî ya Sûriyê de hatibû îmzekirin dest pê kir, yekem kafila koçberên Efrînê duh ji Cizîrê ket rê. Kafila ku ji nêzî 400 malbatan pêk dihat di bin tedbîrên ewlehiyê de ber bi welatê xwe ve çû.

Hêzên Ewlekariya Navxweyî (Asayiş) bi kafile re bûn. Di heman demê de Cîgirê fermandarê Hêzên Ewlekariya Navxweyî ya Hesekê Mehmûd Xelîl, ji fermandarên Asayişê Nesrîn Abdullah û hin berpirsên hikûmetê jî di rêwîtiyê de amade bûn.

Konvoya ku ji bo vegera koçberan hatibû amadekirin, ji sedan otomobîl û otobûsên taybet ên ku girêdayî Meclîsa Koçberên Efrîn–Şehba û Parastina Sivîl a Sûriyê bûn pêk dihat. Konvoy di rêya Reqa, Tebqa û Heleb derbas bû û di demên sibehê de gihîşt Efrînê.

Malbatên ku piştî salan koçê bi zorê vegeriyan, li Efrînê bi stran, def û zîlgîtan hatin pêşwazî kirin. Gelê bajêr bi komek girseyî li meydanê civiyan û vegera wan bi şanazî pêşwazî kir.

Hêzên Ewlekariya Navxweyî (Asayiş) di 7’ê Adarê de ragihandibûn ku yekem kafila koçberên ku ji navçeyên Şiyê, Cindirês û Mabata yên Efrînê ne, dê di 9’ê Adarê de ji Cizîrê ber bi Efrînê ve were rêkirin.

Cîgirê fermandarê Hêzên Ewlekariya Navxweyî ya Hesekê Mehmûd Xelîl, ku bi kafile re bû, di daxuyaniyekê de got ku ji bo vegera ewleh a koçberan korîdoreke ewle di demeke kurt de hat vekirin. Wî diyar kir ku amadehî di sê rojan de hat temamkirin û armanca wan ev e ku hemû koçber berî Newrozê vegerin Efrînê.