SEROKÊ KOMARA LUBNANÊ AVN: ÊRÎŞÊN ÎSRAÎLÊ WELATÊ ME DI KRÎZEKE KÛR DE DIXÎN

Piştî ku Îsraîl operasyonên xwe yên leşkerî li Başûrê Lubnanê zêde kir û ragihand ku Keleha stratejîk ya Şaqîfê ketiye bin kontrola xwe, Serokê Komara Lubnanê Joseph Avn bi awayekî tund bersiv da. Avn got ku welatê wî bi êrîşên Îsraîlê yên ku encamên giran hene re rû bi rû ye û bang li civaka navneteweyî kir.

Avn di peyamekê de ku li ser platforma X belav kir, got ku bi taybetî sivîlên li Başûrê Lubnanê dijîn rastî zehmetiyên mezin tên. Wî diyar kir ku ji bo dawî anîna van zehmetiyan hewl didin û pêdivî ye ku saziyên navneteweyî rola xwe ya çalak zêdetir bikin.

Herwiha hat ragihandin ku bi daxwaza Fransa, Encumena Ewlekariyê ya Neteweyên Yekbûyî dê roja Duşemê ji bo nîqaşa li ser pêşveçûnên Lubnanê civîneke lezgîn pêk bîne.

Di aliyekî din de, Serokwezîrê Îsraîlê Binyamin Netanyahu destgirtina Keleha dîrokî ya Şaqîfê wekî pêşketineke girîng a leşkerî nirxand. Netanyahu got ku artêşa Îsraîlê dê operasyonên xwe li herêmên ku Hizbullah lê xwedî bandor e berfirehtir bike.

Di nav şer û pevçûnan de, Wezareta Tenduristiyê ya Lubnanê ragihand ku di êrîşeke asmanî de li bajaroka Deyr Zehranî ya girêdayî Nebatiyê heşt kes jiyana xwe ji dest dan. Li gorî daxuyaniyê, sê jin di nav miriyan de bûn û 19 kesên din, ku piraniya wan jin û zarok bûn, birîndar bûn.

Di heman rojê de, di êrîşeke din a asmanî de li bajaroka Kfar Sîr a herêma Nebatiyê çar kes hatin kuştin.

Artêşa Îsraîlê jî ragihand ku di pevçûnan de windahiyên wan hene. Li gorî daxuyaniyê, Başçawiş Adam Tzarfati yê 20 salî di operasyonên Başûrê Lubnanê de hatiye kuştin. Çavkaniyên leşkerî gotin ku ew di êrîşeke balafira bêmirov ya ku tê gotin ji aliyê Hizbullahê ve hate şandin de jiyana xwe ji dest daye.

Li gorî hejmarên Îsraîlê, ji 2’ê Adarê ve ku pevçûn dîsa gur bûn, jimara Îsraîliyên ku hatine kuştin gihîştiye 26 kesan. Ji van 25 leşker û yek jî karmendekî sivîl bûye.

Li gorî agahiyên ji herêmê hatine, hêzên asmanî yên Îsraîlê di roja Yekşemê de gelek cihên niştecihbûnê li Başûrê Lubnanê bombebaran kirin. Di heman demê de gelek herêm bi topan hatin hedefgirtin û mal û avahiyên gelek deveran zirar dîtin.

Hizbullah jî ragihand ku di nav rojê de li hember armancên leşkerî yên di axa Lubnanê ya dagirkirî û nav Îsraîlê de 21 operasyon pêk aniye. Berdewamîya van êrîşan xofên derbarê berfirehbûna şerê herêmî de zêde dike.