QSD Û ŞAM LI SER ATEŞKES Û ENTEGRASYONÊ LI HEV RÛ NÎŞAN DAN

Bi navgîniya Dewletên Yekbûyî yên Amerîkayê, piştî civînên siyasî yên li Hewlêr û Şamê hatin lidarxistin, hate ragihandin ku di navbera Hêzên Sûriya Demokratîk (QSD) û hikûmeta derbasî ya Sûriyê de li ser ateşkesek bi temamî û entegrasyonek giştî hatine lihevkirin. Dema ku ev peyman ji aliyê hikûmeta derbasî ya Sûriyê ve bi giştî hate ragihandin, QSD heta niha daxuyaniyek fermî derxistina xwe nedaye.

Duh li Hewlêrê civînek hate lidarxistin ku tê de rewşa Sûriyê û pêşketinên Bakur û Rojhilata Sûriyê hatin nirxandin. Di civînê de serokê KDP’ê Mesûd Barzanî, nûnerê taybet ê Amerîkayê ji bo Sûriyê Tom Barrack, fermandarê giştî yê QSD Mazlûm Ebdî, endamê fermandariya giştî ya QSD Rohilat Efrîn, hevserokê Dîwana Têkiliyên Derve ya Rêveberiya Xweser a Demokratîk a Bakur û Rojhilata Sûriyê Îlham Ehmed û serokê ENKS’ê Mihemed Îsmaîl beşdar bûn.

Piştî vê civînê, îro li Şamê serokê hikûmeta derbasî ya Sûriyê Colanî daxuyand ku bi QSD re li ser “ateşkesek bi temamî û entegrasyonek tevahî” hatine lihevkirin. Di konferansek çapemeniyê ya hevbeş ku li Qesra Tişrînê li Şamê hat lidarxistin de, Colanî û Tom Barrack gotin ku Mazlûm Ebdî amade bû ku beşdar bibe, lê ji ber şertên hewayî yên nebaş nikarî bû Şamê were.

Colanî di daxuyaniya xwe ya kurt de got: “Di navbera hikûmeta Sûriyê û Hêzên Sûriya Demokratîk de li hemû cepheyan ateşkesek giştî hate peyda kirin û fermankirin hatine dayîn.” Wî got ku hûrguliyên pêkanîna peymanê dê di demeke din de bi Mazlûm Ebdî re werin gotûbêjkirin û got ku hîn jî di navbera her du aliyan de li ser hin mijaran cûdahî hene.

Piştî civînê, ajansa fermî ya Sûriyê SANA wêneyek weşand ku di destê Colanî de metna peymana 14 bendî ya ku tê gotin her du aliyên îmze kirine heye. Ev metn, ku ji aliyê QSD ve heta niha nehatiye piştrastkirin, ji bilî ateşkesê, entegrasyona leşkerî, îdarî û ewlehiyê jî dihewîne.

Di peymanê de, ragihandina ateşkesê ya derhal li hemû cepheyan, vekişandina hêzên QSD’yê ber bi rojhilata Fîratê, veguheztina Dêrazor û Reqa’yê bi şertên îdarî û leşkerî bo Şamê, entegrasyona saziyên sivîl yên Hesekê û radestkirina dergehên sînorî û qadên petrol û gazê ji bo hikûmeta navendî cih digire.

Her weha, tê de entegrasyona hêzên leşkerî û ewlehiyê yên QSD’yê bi şêweya kesane di nav Wezaretên Parastinê û Karên Hundirîn de, parastina rewşa taybet a herêmên Kurdî, parvekirina berpirsiyariyên girtîgeh û kamplên DAÎŞ’ê bi Şamê re, nasîna mafên çandî û zimanî yên Kurdan û vegerandina ewlehî ya gelê Efrîn û Şêxmeqsûd jî têne pêşniyar kirin.

Di metnê de jî şertên derxistina endamên PKK’yê yên ne Sûrî ji derveyî sînorên Sûriyê û berdewamkirina şerê li dijî IŞÎD’ê bi hevkarî ya Amerîkayê û Koalîsyona Navneteweyî hate binavkirin.

Dema ku QSD li ser peymana ku ji aliyê hikûmeta derbasî ve hate ragihandin hîn daxuyaniyek fermî nade, wê di rojên bê de bê zanîn ku ev lihevkirin dê çawa li ser rewşa siyasî û meydanî bandor bike.