PYD Û ENKS PÊŞKETİNÊN DAWÎ Lİ SER MASEYÊ DAN

Rêveberên Partiya Yekîtiya Demokratîk (PYD) û Encûmena Niştimanî ya Kurdên Sûriyê (ENKS) ji bo nirxandina pêşketinên herêmî civiyan. Civîn li navenda PYD’ê hat lidarxistin û di wê de hat xêzkirin ku pirsgirêka Kurdî divê di çarçoveya Peymana 10’ê Adarê de bi rêya diyalogê were çareserkirin.

Civîna ku bi basîna ragihandinê hate kirin, ji aliyê PYD’ê ve Hevserok Xêrîb Hiso, endamê Konseya Serokatî Aldar Xelîl û endamê Têkiliyên Gel Kemal Akîf beşdar bûn. Ji aliyê ENKS’ê ve jî Serok Mihemed Îsmaîl, axaftvan Fêsel Yusif û rêveberên Fesla Yusif û Nîmed Dawud di civînê de amade bûn.

Li gorî agahiyên ku ji beşdarên civînê hatine wergirtin, ajanda sereke ya civînê pêşketinên dawî û êrîşên li dijî taxên Şêxmeqsûd û Eşrefiyê yên bajarê Helebê bûn. Di civînê de li ser pêwîstiya girtina helwestek hevbeş li dijî van êrîşan hate rawestan.

Her weha her du alî li ser Peymana 1’ê Nîsanê rawestan û destnîşan kirin ku divê mafê niştecîhên taxên Şêxmeqsûd û Eşrefiyê yên ku li herêmên xwe bimînin û xwe bi xwe birêve bibin were parastin.

Di civînê de girîngiya pêkanîna Peymana 10’ê Adarê hate binavkirin û her du alî li ser vê yekê bi hev re razî bûn ku pirsgirêka Kurdî divê di çarçoveya vê peymanê de bi rêya diyalogê were çareserkirin. Di dawiyê de jî biryar hate dayîn ku diyalog û têkiliyên navbera PYD û ENKS’ê dewam bikin.