PEYAMA CÊJNA RAMAZANÊ YA JI ALIYÊ KNK’Ê VE: “LI GEL HEMÛ ZORÎYAN JÎ HÊVIYA AŞTÎ Û AZADIYÊ DOM DIBE”

Encumena Rêveberiya Kongreya Neteweyî ya Kurdistanê (KNK) bi vesîleya Cêjna Ramazanê peyamek weşand û di wê de Cêjna Ramazanê li hemû gelê Kurdistanê û hem jî li hemû cîhana Îslamê pîroz kir, bi taybetî li ser girtîyan û kesên ku di têkoşîna azadîyê de ne.

Di peyamê de hat gotin ku her çend li herêmê pevçûn û nezelaliyên siyasî hene jî, baweriya ku gelê Kurdistanê dê rojekê di şertên azadî û aştiyê de bijîn hîn jî didome.

Di daxuyaniyê de hat diyarkirin ku hefteya Newrozê, ku destpêka biharê nîşan dide, bi Cêjna Ramazanê re li heman demê tê. Her weha hat gotin ku Rojhilata Navîn di pêvajoyeke girîng û hessas de derbas dibe. Di vê çarçoveyê de, hat nîşandan ku pevçûnên di navbera Îran û Îsraîlê de tensîyona herêmî zêde kirine.

Di daxuyaniyê de jî hat gotin ku pêşketinên li Rojhilatê Kurdistanê bûne yek ji mijarên girîng ên rojevê. Piştî êrîşên li ser Rojava, her çend bi rêveberiya Şamê re peyman hatine kirin jî, nezelaliya siyasî li hemû Sûriyeyê hîn jî berdewam e. Di heman demê de hat ragihandin ku pêvajoya diyalogê ya li Tirkiyeyê li ser pirsgirêka Kurdî ketîye qonaxeke nû. Her weha hat bîranîn ku li Başûrê Kurdistanê her çend ji hilbijartinan demek dirêj derbas bûye jî, hêj hukûmet nehatîye damezrandin û pirsgirêkên bi Bağdayê re didomin.

KNK di daxuyaniyê de bal kişand ser vê yekê ku şerê di navbera Îran û Îsraîlê de bi taybetî bandorê li ser Başûrê Kurdistanê jî dike, û herêm carinan dibe armanca êrîşan.

Her weha di daxuyaniyê de hate ragihandin ku nîzama siyasî ya Rojhilata Navîn dîsa tê çêkirin, û statukoyên ku bi peymanên dîrokî hatine ava kirin êdî nikarin bidomin. Tevî vê yekê, hat gotin ku gelê Kurd tevî ku ne aliyekî pevçûnan e jî, ji pêşketinên herêmî rasterast bandor digire.

Encumena Rêveberiya KNK’ê di dawiyê de diyar kir ku tevî hemû zehmetiyan hêvîdar in û bawer dikin ku gelê Kurdistanê dê di demeke nêz de cêjnên xwe bi aşitî, aramî û azadî li ser axa xwe pîroz bike.

Peyam bi daxwazên cêjnê ji bo hemû girtîyan, kesên ku têkoşîna azadîyê didin, gelê Kurdistanê û hemû cîhana Îslamê bi dawî bû.