MAZLUM ABDÎ: DIVÊ TÊKILIYÊN ME BI TIRKIYEYÊ RE JI NÛ WERE NIRXANDIN

Mazlum Abdî, Fermandarê Giştî yê Hêzên Sûriyeya Demokratîkê (QSD) û Şêwirmendê Serokatiya Komara Sûriyeyê, got ku di pêvajoya nû de divê têkiliyên bi Tirkiyeyê re ji nû ve bên nirxandin û di zemînekî avaker û xwezayî de bên pêşxistin.

Abdî di hevpeyvîna xwe ya bi rojnameya Yeni Yaşam re derbarê pêvajoya entegreya QSDê di artêşa Sûriyeyê de axivî û got ku QSD li gorî lihevhatina hatî çêkirin, bi awayekî plan û gav bi gav beşdarî artêşê bûye. Abdî got: “Niha wê wekî parçeyek ji artêşa Sûriyeyê berdewam bike ku vê herêmê biparêze.”

“JI BO ZIMANÊ KURDÎ GAVEKE MEZIN HAT AVAKIRIN”

Abdî qebûlkirina fermî ya zimanê Kurdî di perwerdehiya Sûriyeyê de wekî pêşketineke girîng nirxand û got ku cara yekem e ku Kurdî bi awayekî fermî di perwerdehiyê de hatiye qebûlkirin û hin dersên din jî dê bi Kurdî bên dayîn.

Wî got ku gavên hatine avakirin erênî û dîrokî ne, lê ji bo daxwazên gelê Kurd hîn têr nake û ji bo pêşxistina van destkeftiyan divê têkoşîn bidome.

“EM DIXWAZIN BIKETIN NAV PÊVAJOYEKE NÛ”

Abdî got ku Sûriye dikeve nav qonaxeke nû û armanca wan a bingehîn ji beşdarbûna wan di pêvajoya ku li Şamê tê meşandin, ew e ku entegrasyon pêk were û Kurdan di hundirê dewletê de cihê xwe bi awayekî hêzdar bigirin.

Abdî diyar kir ku armancên wan tenê bi herêmên Kurd re sînordar nabin û dixwazin li hemû deverên Sûriyeyê roleke erênî û avaker bilîzin.

“DIVÊ TÊKILIYÊN ME BI TIRKIYEYÊ RE WERE SERERASTKIRIN”

Abdî bal kişand ser girîngiya ji nû ve nirxandina têkiliyên bi Tirkiyeyê re û got ku di navbera her du aliyan de hîn jî kanalên têkilî û diyalogê hene.

Abdî got: “Di pêvajoya nû de divê têkiliyên me bi Tirkiyeyê re jî bêne sererastkirin û ji nû ve bên nirxandin. Îro jî di navbera me û Tirkiyeyê de têkilî û kanalên diyalogê hene. Êdî divê ev pêvajo li ser zemînekî xwezayî û avaker pêş bikeve.”

Abdî got ku têkiliyên avaker ên bi Tirkiyeyê re hem ji bo hemû Sûriyeyê hem jî ji bo gelê Kurd dê di berjewendiya wan de bin.

Wî herwiha got ku divê Dûrzi, Elewî, Kurd û hemû komên din di hundirê dewleta Sûriyeyê de bi awayekî hêzdar cih bigirin.

REWŞA EFRÎN Û SERÊKANIYÊ

Abdî got ku ji bo Efrînê divê lihevhatina ku ji bo herêmên Cizîrê û Kobanê hatiye gihiştin, bi awayekî wekhev were sepandin. Wî diyar kir ku bi taybetî di warên perwerdehiyê, rêveberiya herêmî û beşdarbûna gel di mekanîzmayên ewlehiyê de hin pirsgirêk hene û ji bo çareserkirina wan tê xebitandin.

Abdî got ku hîn vegera gelê Serêkaniyê dest pê nekiriye û berê hin komên dijî entegrasyonê û dijî lihevhatina bi dewletê re asteng li pêşiya vegera gel çêkirine.

Wî diyar kir ku tedbîrên pêwîst hatine girtin û vegera gelê Serêkaniyê dê bi awayekî plan û gav bi gav bidome û pêvajo dê were temamkirin.

“DIVÊ EM DÎSA TÊKOŞÎNÊ BIKIN”

Abdî got ku pêvajoya heyî bi tevahî gihiştina hemû armancan ne mumkin bû, lê tevî vê yekê destkeftiyên girîng hene.

Wî got ku li ser vê bingehê divê ji bo armancên ku wan berê bi hev re dest pê kiribûn û ji bo wan têkoşîn kiribûn, dîsa têkoşîn bidin.

Abdî bang li gelê Kurd kir ku di pêvajoya nû de jî baweriya xwe bi rêveberên xwe bihêlin û got: “Were em ji bo serkeftinê bi hev re bimeşin.”