LI QAMIŞLO Û KOBANÊ OPERASYONÊN LI TIL ERAN Û TIL HASIL HATIN ŞERMEZARKIRIN

Li Qamişlo û Kobanê bi sedan kes ji bo şermezarkirina operasyonên, lêgerînên malan, girtinan û îdiayên êşkenceyê yên li bajarokên Til Eran û Til Hasil li gundewarê Helebê hatine lidarxistin civiyan. Di çalakiyan de daxwaz hate kirin ku binpêkirinên mafên jinan bêne lêkolînkirin û berpirsiyar bên darizandin.

Li gorî agahiyan, hêzên girêdayî Hikûmeta Demkî ya Sûriyeyê di Til Eran û Til Hasil de gelek malan lêgerîn kirin, zêdetirî 10 kes girtin û li ser hin kesên girtî îdiayên êşkenceyê hatin ragihandin.

Li Qamişlo li pêşiya Navenda Çand û Hunerê ya Mihemed Şêwo û li Kobanê li Meydana Jina Azad çalakî hatin lidarxistin. Beşdaran kiryarên li dijî jinan û ciwanan şermezar kirin û di daxuyanîyan de gotin ku armancgirtina sivîlan binpêkirina mafên mirovan e. Her weha daxwaz kirin ku jin bêne parastin, maf û azadiyên bingehîn bêne misoger kirin û berpirsiyarên van binpêkirinan bên dadgehkirin.

Xwepêşanderan her weha bang li saziyên navneteweyî û rêxistinên mafên mirovan kirin ku bi awayekî serbixwe van bûyeran lêkolîn bikin û li dijî binpêkirinan gavên pêwîst bavêjin.

Di çalakiya Kobanê de Ayşe Efendî, endama Meclîsa Malbatên Şehîdan a Kobanê, got ku gelê Kurd li her derê ku dijî dê piştgirî û yekîtîya xwe biparêze. Wê diyar kir ku êrîşên li dijî jinan nayên qebûlkirin û têkoşîna jinên Kurd di salên borî de bûye nîşaneya berxwedanê. Wê her weha got ku Yekîneyên Parastina Jin (YPJ) nûnertiya siyasî û leşkerî ya jinên Kurd temsîl dike.