LI MÊRSÎN, ADANA, RIHA Û DÎLOKÊ ŞEHÎD TÊN BÎRANÎN

Ji bo kesên ku di têkoşîna azadiya Kurdî de jiyana xwe ji dest dane, li Mêrsîn, Adana, Riha û Dîlokê bernameyên bîranînê didomin. Çalakiyên ku ji bo sê rojan hatine plankirin, bi beşdariya malbatên şehîdan, bi hezaran welatî û nûnerên rêxistinên demokratîk ên girseyî tên lidarxistin.

Li Mêrsîn, Adana, Riha û Dîlokê ji bo kesên ku di dîrok û herêmên cuda de jiyana xwe ji dest dane, bîranîn bi beşdariya malbat û welatiyan didomin.

MÊRSÎN

Li Mala Sersaxiyê ya Gunesê li taxa Gunesê ya girêdayî navçeya Akdenîzê ya Mêrsînê, roja duyemîn a bîranînê ku bi pêşengiya MEBYA-DERê tê lidarxistin dest pê kir.

Li cihê bîranînê pankartên bi nivîsên “Şehîdên me rûmeta me ne”, “Em şehîdên azadiyê bi bîr tînin” û “Şehîd namirin” hatin daliqandin. Li ser maseyan, ji bilî alayên zer, sor û kesk, wêneyên şehîdan û Rêber Apo û gulên sor hatin danîn.

Piştî hatina malbatên şehîdan bo mala sersaxiyê, malbat bi dirûşmeya “Şehîd namirin” hatin pêşwazîkirin. Di dema çalakiyê de dirûşmeya “Bijî Serok Apo” jî hat gotin.

ADANA

Li Adanayê roja duyemîn a bîranîna ji bo kesên ku di têkoşîna azadiya Kurdî de jiyana xwe ji dest dane, li Mala Sersaxiyê ya Ova li taxa Ova didome.

Di programa ku bi pêşengiya AKKAY-DERê tê lidarxistin de pankartên bi nivîsên “Şehîdên me rûmeta me ne”, “Em şehîdên azadiyê bi bîr tînin” û “Şehîd namirin” hatin daliqandin. Li salona bîranînê postera mezin a Rêber Apo û wêneyên şehîdan hatin danîn û qad bi alayên zer-sor-kesk û gulên sor hat amadekirin.

Malbatên şehîdan dema ku hatin mala sersaxiyê bi dirûşmeyên “Şehîd namirin” hatin pêşwazîkirin. Beşdaran herwiha dirûşmeyên “Riya şehîd riya me, Apo ye Serokê me” û “Bijî Serok Apo” gotin.

RIHA

Li ser pêşengiya KAT-DERê li navçeyên Wêranşar, Pirsûs û Eyyûbiyê yên Riha ji bo kesên ku di dîrok û herêmên cuda de jiyana xwe ji dest dane bernameyên bîranînê tên lidarxistin.

Li Wêranşarê bername li Mala Sersaxiyê ya Sîyamend Akbaş li taxa Nû hat lidarxistin. Li salonê wêneyê Rêber Apo û wêneyên şehîdan, herwiha pankartên bi nivîsên “Şervanen Kurdîstanê cangorîyên Azadîyê em her dem li ser şopa we ne” û “Doza me ji bo soza me, soza me ji bo şehîdên me” hatin daliqandin.

Di bernameya ku di saetên sibehê de dest pê kir de gelek welatî beşdar bûn. Ciwanên Wêranşarê meşek saz kirin û bi meşê gihiştin cihê bîranînê. Piştî rêzgirtinê, marşa “Çerxa Şoreşê” hat xwendin û dirûşmeyên “Şehîd namirin” û “Bijî Serok Apo” hatin gotin.

Di axaftinan de peyama ku dê rêça şehîdan were şopandin û têkoşîna wan were mezinkirin hat dayîn.

Hat ragihandin ku li Mala Sersaxiyê ya Rezanoğlu li taxa Selçuklu ya Eyyûbiyê û Mala Sersaxiyê ya Mustafa Dağ li taxa Sarayaltiyê ya Pirsûsê jî dê bernameyên bîranînê bêne lidarxistin.

DÎLOK

Li Dîlokê bernameya bîranînê ya ku bi pêşengiya MEBYA-DERê dest pê kiriye, di roja duyemîn de didome. Di çalakiyê de, ku hatiye plankirin ku sê rojan bidome, ji herêmên cuda yên bajêr gelek welatî, nûnerên rêxistinên girseyî yên demokratîk û malbatên şehîdan beşdar dibin.

Li salona bîranînê pankartên ku wêneyên Rêber Apo û kesên ku di dîrokên cuda de jiyana xwe ji dest dane tê de cih digirin. Herwiha pankartên bi nivîsên “Şehîd namirin” û “Şehîdên me rûmeta me ye” hatin daliqandin. Di dema bernameyê de gelek caran dirûşmeya “Şehîd namirin” ji salonê bilind bû.