LI DÊRIKÊ SÊ ŞERVAN BI MERASÎMEKÊ HATIN OXIRKIRIN

Şervanên YPJ’yê Kurdistan (Nesrîn Çîlo) û Koçerîn Lavîn (Nûrcan Başik) û şervanê QSD’yê Xalid Cûdî (Levent Yıldırım), di Goristana Şehîd Xebat a Dêrikê de bi merasîmeke fermî hatin axkirin. Di merasîmê de ku bi beşdariya gelek kesan pêk hat, têkoşîna şehîdan û mîrasa wan hate xuyang kirin.

Merasîm ji aliyê Meclîsa Malbatên Şehîdan a Dêrikê ve hate organîzekirin û gelek kes ji Dêrik, Girkê Legê û Çilaxa beşdar bûn. Merasîm bi rawestana rêzgirtinê dest pê kir û dûv re şervanên YPJ û QSD’yê merasîmeke leşkerî pêk anîn.

Yek ji fermandarên YPJ’yê Çiçek Botan di axaftina xwe de got ku azadî bi bedelên giran tê bidestxistin. Wê got ku gelê ku salan li hember siyaseta înkar û tunekirinê sekinîye, ê têkoşîna xwe bidomîne û ji bo parastina gel û azadiya wî her dem amade ye.

Endamê rêveberiya Meclîsa Malbatên Şehîdan Mihemed Cemîl jî di axaftina xwe de bal kişand ser ku hemû destkeftî bi fedakariyên şehîdan hatine bidestxistin. Wî got divê mîrasa şehîdan were parastin û heta armancên wan pêk bên rêya wan were domandin.

Endamê Kongreya Îslama Demokratîk Yûsif Faris jî şehîdên azadiyê bi bîr anî û got ku têkoşîna wan li dijî planên li dijî gelê Kurd bingeha berxwedan û parastina mafên gel e.

Piştî axaftinan, belgeyên ku jiyana şehîdan tê de hatibû nivîsandin ji malbatên wan re hatin radestkirin. Merasîm bi axkirina şehîdan di Goristana Şehîd Xebat de di nav dirûşmanan de bi dawî bû.