KÜRKÇÜ: RÊYA SERDEMA NÛ BI TÊKOŞÎNA SÎYASÎ YA TEVGERA KURDAN VE BÊ DESTNÎŞANKIRIN

Serokê Rûmetî yê HDPê Ertuğrul Kürkçü, bi dawîhatina şerê çekdarî di pêvajoya Civat û Aştiyê ya Demokratîk de qadeke nû ya siyasî hatiye vekirin û diyar kir ku pêşeroja vê serdemê dê bi pratîka siyasî ya Kurdan a li ser bingeha mafên wekhev û bi xeta siyasî ya ku Tevgera Kurd dê pêşkêş bike were şekildan.

Kürkçü, di nirxandinên xwe yên ji ANFê re de, got ku Abdullah Öcalan di çarçoveya pêvajoyê de berpirsiyariyên xwe bicîh aniye û mijara bingehîn a vê gavê ew e ku Kurd di qada siyasî ya nû de dê bi çi awayî wek hemwelatiyên xwedî mafên wekhev beşdarî avakirina nû ya civakê bibin. Wî got ku dewlet heta niha balê xwe daye ser bidawîanîna pevçûnê, lê ji bo piştî vê gavê soz û taahhûdên siyasî yên girêdayî pêşkêş nekiriye.

Kürkçü diyar kir ku piştî dawîhatina vebijêrka têkoşîna çekdarî, maf divê di hawîrdora siyasî ya nû de bi awayekî pratîkî bên diyarkirin. Wî bang kir ku di nav Tevgera Kurd de nîqaşeke siyasî ya vekirî bê kirin. Li gorî wî, ev nîqaş divê tenê bi mijarên müzakereyê sînordar nemîne û pêşveçûnên li Rojava, Başûr û Rojhilatê jî dê bandorê li pêşeroja pirsa Kurdî ya li Tirkiyeyê bikin.

Kürkçü bal kişand ser vê yekê ku qada bingehîn a ku dê pêşeroja pêvajoyê diyar bike, pratîka siyasî ya li Tirkiyeyê ye.

‘DERBARÊ PÊVAJOYÊ DE NERÎNÊN CÛDA HENE’

Kürkçü, derbarê statûya Kurdan li Sûriyeyê û nêzîkatiya dewletê bi rêya têkiliyên Ankara-Şam de, got ku daxuyaniyên Hakan Fidan û helwesta Devlet Bahçelî ya li hember Abdullah Öcalan aliyên cuda nîşan didin.

Wî got ku Fidan helwestek nîşan dide ku nîqaşên derbarê pozîsyona kolektîf a Kurdan li Sûriyeyê hene û Bahçelî jî li ser pozîsyona Öcalan di pêvajoyê de helwesteke parastinê nîşan dide. Lê Kürkçü her wiha got ku ji bo hebûna nêzîkatiyek siyasî ya kûrtir li pişt vê cudahiyê agahiyên têr nîne.

‘JI BO PÊŞVEÇÛNA PÊVAJOYÊ GAVÊN BERBIÇAV PÊWÎST IN’

Kürkçü bal kişand ser peyama dawî ya Öcalan û girîngiya avakirina gavên pratîkî yên hevbeş û destpêkirina karê komîteyan piştî derketina qanûnê. Wî got ku heta niha di vê warî de gavên berbiçav û têrker nehatine avakirin.

Kürkçü got ku şertên bicihanîna qanûnê ji aliyê rêveberiyê ve tên diyarkirin û hêj çarçoveyeke vekirî ya derbarê awayê meşandina pratîkî ya pêvajoya çekberdanê û çalakbûna saziyên têkildar de ji raya giştî re nehatiye pêşkêşkirin.

Wî diyar kir ku avakirina siyasî ya Tevgera Kurd di pêşerojê de û pozîsyona wê di qada siyasî de jî dê di pêşeroja pêvajoyê de roleke girîng bilîze. Li gorî wî, dema ku Meclîs dîsa vebe dê ji vê aliyê ve demeke girîng be.

‘DI SERDEMA NÛ DE RÊYA SIYASETA KURDAN GIRÎNG E’

Kürkçü got ku divê veguherîna ku li Tirkiyeyê pêwîst e bi perspektîfa demokrasî û têgihiştina rêvebirinê bê nirxandin. Wî got ku hikûmet pêvajoyê di çarçoveyeke muhafezekar de digire dest.

Kürkçü diyar kir ku Tevgera Kurd di serdema nû de divê îradeya xwe ya siyasî bi awayekî vekirî nîşan bide û got ku xeta siyasî ya ku dê di pêşerojê de were pejirandin dê bandorê li rêya pêvajoyê bike.