JI MALBATÊN ŞERVANÊN QSD’Ê BANGA AZADKIRINÊ

Malbatên şervanên Hêzên Sûriya Demokratîk (QSD) yên ku li cem Hikûmeta Demkî ya Sûriyeyê têne girtin, bi çalakiyên li Qamişlo û Amûdê pêk anîn daxwaza azadkirina xizmên xwe kirin.

Li Qamişloyê, malbat li çaralîya Sonî civiyan û wêneyên xizmên xwe yên esîr hatine girtin hilgirtin. Beşdarên çalakiyê bi sloganan daxwaza azadkirina lezgîn a şervanan kirin û xwestin ku şertên peymanên di navbera aliyan de hatine kirin bê kêmasî werin bicîhkirin.

Di heman demê de li Amûdê jî çalakiyeke wekhev hate lidarxistin. Li Meydana Jina Azad a Amûdê malbat, zarok û gelek welatî civiyan û bang li serbestberdana esîran kirin.

Di dema çalakiyê de beşdaran wêneyên esîran hilgirtin û pankartên ku li ser wan “Zarokên me berdin” û “Em zarokên xwe dixwazin” nivîsî bûn, hilgirtin.

Malbatan diyar kir ku xizmên wan demeke dirêj e ji azadiya xwe bêpar in û daxwaza lezgirtina pêvajoyê kirin.

Di daxuyaniyan de hate bîranîn ku li gorî peymana 29’ê Çileyê heta niha pênc komên esîran hatine azadkirin û dawî jî 28 şervanên YPJ azad bûne.

Malbatên esîran bang li aliyên têkildar kirin ku hemû şervanên ku hîn di esaretê de ne werin azadkirin û şertên peymanê bi tevahî werin bicîhkirin.