Akademîsyen û endamê Meclîsa Parlamenteran a Konseya Ewropayê Hişyar Ozsoy bang kir ku biryara “mafê hêvîyê” ya derbarê Abdullah Öcalan de were pêkanîn û got ku Konseya Ewropayê û saziyên girêdayî divê di vê mijarê de berpirsiyariyek mezin hilgirin.

Ozsoy diyar kir ku kampanyayên navneteweyî yên ji bo azadiya Abdullah Öcalan di van demên dawî de li ser pêkanîna biryara Dadgeha Mafên Mirovan a Ewropayê (AİHM) ya sala 2014’an a mafê hêvîyê hatine komkirin.

“TIRKIYE HÊ PLANÊKE ÇALAKIYÊ NEXISTIYE”

Ozsoy got ku biryara AİHM’ê ya derbarê Abdullah Öcalan de heta niha nehatiye pêkanîn û bi bîr xist ku Komîteya Wezîran a Konseya Ewropayê berê ji Tirkiyeyê xwestibû ku planeke çalakiyê amade bike.

Wî got ku heta niha tu planeke eşkere ya pêkanîna mafê hêvîyê nehatiye pêşkêşkirin.

“MAFÊ HÊVÎYÊ TENÊ MIJEYA ŞEXSÎ NÎYE”

Ozsoy bal kişand ser ku mafê hêvîyê tenê bi azadiya kesane ya Abdullah Öcalan ve girêdayî nîne, lê di heman demê de ji bo pêvajoya siyasî ya heyî jî girîng e.

Wî got ku Abdullah Öcalan ji aliyê Kurdan ve wek aktoreke girîng a pêvajoyê tê dîtin û qebûlkirina mafê hêvîyê dê alîkariya pêşveçûna vê pêvajoyê bike.

“TEVÎ GAVÊN YEKALÎ JÎ PÊŞKETINEK NAYE DÎTIN”

Ozsoy got ku di demên dawî de aliyê Kurd gavên cuda avêtine, lê di warê bicihanîna soz û peymanan de hêj pêşketineke têr nehatiye dîtin.

Wî diyar kir ku bicihanîna sozên hatine dayîn ji bo pêvajoyê gelek girîng e.

BANGA BERPIRSIYARIYÊ JI KONSEYA EWROPAYÊ RE

Ozsoy got ku welat û saziyên Ewropayê divê di çareserkirina demokratîk a pirsgirêka Kurd de roleke çalaktir bilîzin.

Wî bal kişand ser ku pêkanîna biryarên mafên mirovan û demokratîk dê hem ji bo demokratîkbûna Tirkiyeyê hem jî ji bo pêşveçûna pêvajoya heyî alîkar be.