HEVserokê MATUHAYDER ZEKÎ KILIÇ LI AXÊ HAT SIPARTIN

Hevserokê Komeleya Alîkarî û Hevgirtina Malbatên Girtî û Mehkûmên Marmarayê (MATUHAYDER), Zekî Kılıç, bi merasîmeke girseyî ya li Stenbolê hat lidarxistin, li goristanê hate veşartin.

Cenazeya Kılıç, ku berî du rojan jiyana xwe ji dest dabû, anî ser Mizgefta Hz. Ebû Bekir a Samandıra ya li navçeya Sancaktepe ya Stenbolê. Nûnerên partiyên siyasî û rêxistinên civaka sivîl, her wiha bi sedan kes, beşdarî merasîmê bûn.

Piştî nimêja cenazeyê, cenazeya Kılıç bi meşeke girseyî birin Goristana Navenda Samandıra û li wir hate veşartin. Li goristanê sloganên bi zimanê Kurdî hatin qîrîn, mevlûd hat xwendin û kulîlkên sor li ser gora wî hatin danîn.

Hevseroka MATUHAYDER’ê, Nurten Karagöz, di axaftina xwe ya di merasîmê de got ku Zekî Kılıç heta nefesa xwe ya dawî ji bo azadî û zimanê gelê Kurd têkoşiya. Karagöz diyar kir ku heke pêvajoya ku tê meşandin bi ser bikeve, serkeftina wê dê ji bo kesên ku jiyana xwe ji dest dane, di kesayetiya Kılıç de were veqetandin.

BI SALAN TÊKOŞÎN MEŞAND

Zekî Kılıç li navçeya Qaxizmanê (Kağızman) ya Qersê ji dayik bû û bi salan di nava têkoşîna azadiya Kurd de cih girt. Wî li navçe û taxên cuda yên Stenbolê xebat meşand û di vê pêvajoyê de gelek caran hate binçavkirin û girtin.

Kılıç nêzî şeş mehan bû ku bi nexweşiya kansera pankreasê re têdikoşiya. Ew li nexweşxaneya ku lê dermankirinê distand, jiyana xwe ji dest da. Hate gotin ku Kılıç heta qonaxa dawî ya nexweşiya xwe jî xebatên xwe domand.

Piştî veşartina Kılıç, li Komeleya Gundê Şaban a li Çekmeköyê ji bo malbata wî cihê sersaxiyê hate vekirin. Hate ragihandin ku malbat dê sê rojan sersaxiyan qebûl bike.