GIRTIYÊ 30 SALAN ALTUN: DIVÊ EM 24 SAETÊN XWE JI BO AZADIYA RÊBER APO BİDERÊN

Kenan Altun, girtiyê ku piştî 30 salan ji Girtîgeha L-Tîpa ya Hejmar 1 a Maltepeyê hat berdan, diyar kir ku divê têkoşîn ji bo azadiya Rêber Apo bê navber bidome. Wî got: “Heke em 24 saetên xwe ji bo azadiya Rêber Apo nede, em ê encam negirin. Divê em 24 saetan têkoşîn bikin.”

Kenan Altun, ku 30 salan di girtîgehê de bû, ji Girtîgeha L-Tîpa ya Hejmar 1 a Maltepeyê hat berdan. Li ber deriyê girtîgehê kesên ku ji bo pêşwaziyê hatibûn, pêşwaziya wî kirin. Altun di daxuyaniya xwe ya piştî berdanê de got ku ew hat berdan, lê Rêber Apo hîn jî di girtîgehê de ye.

Altun got: “Piştî 30 salan em derketin, lê Rêber Apo hîn jî li hundir e. Heke em 24 saetên xwe ji bo azadiya Rêber Apo nede, em ê encam negirin.”

Altun silavên hevalên xwe yên ku hîn di girtîgehê de ne jî gihand gel û ji kesên ku pêşwaziya wî kirin re spas kir. Wî derbarê rewşa girtiyên li hundir de agahî da û got ku gelek heval nexweş in. Altun diyar kir ku berî derketina xwe, hevalekî 84 salî li girtîgehê hişt.

Altun wiha got:

“Silavên hemû hevalan hene. Ji aliyê wan û ji aliyê xwe ve ji we re spas dikim ku we pêşwaziya min kir. Li hundir gelek heval nexweş in; niha min hevalekî 84 salî li hundir hişt û hatim. Lê dîsa jî ez û hemû heval gelek bi moral in. Hemû gelek gelek silavên xwe ji we re dişînin.

Divê hemû gelê me bi hev re 24 saetên xwe ji bo aştiyê derbas bike. Barê me pir giran e û em vê yekê dizanin. Ev ne dema rûniştinê ye; berevajî, ev dema bilindkirina têkoşînê ye. Ji bo van hemû fedakariyên ku me daye, ji bo siberoja me û ji bo zarokên me, divê em 24 saetên xwe bidin têkoşînê.”