FILISTÎN JI TRUMP XWEST: DIKARE PLANÊN ÎLHAQÊ YÊ NETANYAHU RAWESTÎNE

Nûnerê Daîmî yê Filistînê li Neteweyên Yekbûyî Riyad Mensûr, li dijî hewildanên Îsraîlê yên ji bo ilhaqkirina erdên Filistînê bang li civaka navneteweyî û bi taybetî Serokê Dewletên Yekbûyî Donald Trump kir. Wî got ku Washington dikare bi bikaranîna bandora xwe li ser Îsraîlê pêşî li zêdebûna aloziyên herêmê bigire.

Di civîneke çapemeniyê de ku bi beşdariya welatên Ereban û Nûnerên Rêxistina Hevkariya Îslamî pêk hat, Mensûr got ku Trump berê jî li dijî ilhaqê daxuyanî kiribû û divê ev helwest bi gavên pratîk were piştgirîkirin.

Dîplomatê Filistînî diyar kir ku Serokê Amerîkayê amûrên siyasî yên ku dikarin bandorê li ser Serokwezîrê Îsraîlê Binyamîn Netanyahu bikin hene û Washington dikare di astengkirina planên ilhaqê de roleke girîng bilîze.

Mensûr herwiha bang li Encumena Ewlehiyê ya Neteweyên Yekbûyî kir ku ji bo rawestandina siyaseta Îsraîlê li dijî gelê Filistînê helwesteke navneteweyî ya bi bandortir were girtin.

Nûnerê Erebistanê Siûdî li Neteweyên Yekbûyî, Abdulaziz Alwasil, ku li ser navê Koma Ereban axivî, got ku rewşa li erdên dagirkirî yên Filistînê her roj xirabtir dibe. Wî destnîşan kir ku siyaseta Îsraîlê pêvajoya ilhaqê lez dike û mafên Filistîniyan dixe xeterê.

Alwasil got ku çalakiyên avakirina niştecihên nû li Rojavayê Şerî (Batı Şeria) berdewam in û beşeke girîng a Gazeyê jî di bin kontrola Îsraîlê de ye. Li gorî wî ev siyaset armanca guhartina pêkhateya demografîk û erdnîgarî ya herêmê heye.

Li ser navê Rêxistina Hevkariya Îslamî jî Fikriye Aslî Güven, Cîgirê Nûnerê Daîmî yê Tirkiyeyê li BM, bang li Encumena Ewlehiyê kir ku bi lez tedbîr bigire.

Welatên Erebî û Rêxistina Hevkariya Îslamî diyar kirin ku siyaseta ilhaqê ya Îsraîlê perspektîfa çareseriya du dewletan bi awayekî cidî dixe xeterê û civaka navneteweyî divê gavên bi hêztir bavêje.