ERDOĞAN Û TRUMP LI SER TELEFONÊ AXIVÎN

Serokkomarê Tirkiyeyê Recep Tayyip Erdoğan û Serokê Dewletên Yekbûyî yên Amerîkayê Donald Trump li ser telefonê axivîn. Di axaftinê de, ligel têkiliyên du alî yên Tirkiye û DY, pêşketinên herêmî û gerdûnî hatin nirxandin.

Li gorî daxuyaniya Serokatiya Ragihandinê ya Serokkomariyê, di axaftina telefonê ya Erdoğan û Trump de rewşa têkiliyên du alî û mijarên herêmî û gerdûnî hatin gotûbêjkirin.

Erdoğan diyar kir ku di navbera Îran û DY de di vê tansiyonê de divê ji hewildanên dîplomatîk bi awayekî herî berfireh sûd bê wergirtin. Wî got ku ew dixwazin danûstandin berdewam bikin û Tirkiye dê piştgirîya xwe ji hewildanên ji bo aştiyê li herêmê bidomîne.

Di axaftinê de Erdoğan herwiha behsa Peymana Parastina Hevpar a ku di navbera Tirkiye, Pakistan û Erebistana Siûdî de hatiye îmzekirin kir. Wî diyar kir ku bi vê peymanê wan îradeyeke bihêz ji bo dabînkirina îstîqrar û ewlehiya herêmî nîşan daye.

Pêşketinên Gazze jî di axaftinê de hatin nîqaşkirin. Erdoğan got ku di demekê de ku armanc ew e ku di pêvajoya aştiya Gazze de derbasî qonaxa duyemîn bibin, çalakiyên rêveberiya Îsraîlê yên li dijî Filistîniyan zêde bûne.

Erdoğan diyar kir ku Tirkiye dê piştgirîya xwe ji bo bidestxistina aştiyeke mayînde li Gazze û gavên ku ji bo ji nû ve avakirina herêmê piştî şer dê bên avêtin bidomîne.