ERDHEJEKA 7,8 PÎVAN LI BERAVÊN FÎLÎPÎNAN ALARMA TSUNAMIYÊ LI PASÎFÎKÊ DERXIST

Erdhejeka bi mezinahiya 7,8 pîvan li derveyî Girava Mindanao ya li başûrê Fîlîpînan bû sedema ragihandina alarma tsunamiyê li gelek deverên Okyanûsa Pasîfîkê. Li gorî agahiyên destpêkê, herî kêm yek kes jiyana xwe ji dest da û çar kes jî birîndar bûn.

Enstîtuya Lêkolînên Jeolojî ya Dewletên Yekbûyî (USGS) ragihand ku erdhej roja Duşemê li bin deryayê, li derveyî Girava Mindanao û di kûrahiya nêzîkî 35 kîlometreyan de çêbûye. Erdheja xurt di herêmê de bû sedema tirs û panîkê.

Polîsê Fîlîpînan ragihand ku hin avahî li gelek deverên arşîpelagê hilweşiyan. Li gorî nirxandinên destpêkê, yek kes mir û çar kes jî birîndar bûn.

Piştî erdhejê, Navenda Hişyariya Tsunamiyê ya Pasîfîkê (PTWC) ji bo beravên Fîlîpînan, Endonezyayê, Taywan û Japonyayê hişyariyek belav kir. Navendê ragihand ku di çend saetên pêş de pêla tsunamiyê dikare li beravan çêbibe. Piştî vê hişyariyê, li gelek deveran amadekariyên valakirinê dest pê kirin.

Ajansa Meteorolojî, Klimatolojî û Jeofizîkê ya Endonezyayê (BMKG) jî ragihand ku hişyariya tsunamiyê piştî nêzîkî çar saet û nîv hate rakirin.

Di dema hişyariyê de, Ajansa Neteweyî ya Rêveberiya Karesatan a Endonezyayê ji niştecihên Manado, bakurê parêzgeha Gorontalo û Giravên Sangihe xwest ku ber bi deverên bilind û ewle ve biçin.

Berpirsyaran diyar kir ku erdhej li hin herêmên Endonezyayê tenê du heta sê çirkeyan bi awayekî sivik hate hîskirin. Lêkolîn û şopandina tevgerên deryayê û erdhejên piştî erdhejê berdewam e.