DEWLETA TIRK LI ZIRVEYA NATO’YÊ DIGERE HÊZÊ

Dewleta Tirk ku endamtiya xwe ya NATO’yê salan e wekî amûrekî zextê li dijî Tevgera Azadiya Kurdistanê bi kar tîne, niha hewl dide ku ji tensiyona di navbera DYA û Ewropayê de sûd werbigire û cihê xwe di nav ittifaqê de bibe “navendî”.

Berî Zirveya NATO’yê ya li Enqereyê, Tirkiye têkiliyên xwe yên dîplomatîk zêde kiriye da ku hem bandora xwe ya herêmî zêde bike hem jî giraniya xwe di nav NATO’yê de bêtir xuya bike. Li gorî pisporan, Ankara bi taybetî di demeke ku cihêwaziyên di navbera DYA û Ewropayê de zêde dibin, dixwaze xwe wekî aktorekî bêguhertin li xeta başûr-rojhilatê ittifaqê nîşan bide.

Tê gotin ku vê hewldana Tirkiyê ya cihgirtina stratejîk di nav NATO’yê de ne tenê bi polîtîkayên ewlehî û parastinê sînordar e; herwiha ji bo meşrûkirina polîtîkayên zextê li dijî Tevgera Azadiya Kurdistanê di asta navneteweyî de jî tê bikaranîn.

Bi taybetî di pêvajoyên firehbûna NATO’yê de, Tirkiyê mafê veta xwe wekî amûrekî pazarlikê bi kar aniye da ku daxwazên xwe yên li dijî tevgera siyasî ya Kurdî bide pejirandin; mînakê di daxwazên endamtiyê yên Swêd û Fînlandiyayê de ev yek bi awayekî eşkere hate dîtin.

Li gorî van nirxandinan, Ankara dixwaze di Zirveya NATO’yê de hem kapasîteya xwe ya leşkerî hem jî girîngiya stratejîk a xwe di nav ittifaqê de pêş bixe û valahiya ku ji tensiyona DYA-Ewropayê çêbûye bi berjewendiya xwe bikar bîne.