DEM PARTÎ DI SALVEGERA 111’AN A SEYFOYÊ DE BANGA DADPERWERÎ Û RÛNİŞTINA BI DÎROKÊ RE KIR

Yüksel Mutlu, Hevserokê Giştî yê Alîkar ê berpirsê Komîsyona Gelan û Baweriyan a DEM Partiyê, di salvegera 111’an a Seyfoyê de daxuyaniyek kir û bang li rûniştina bi rastiyên dîrokî re û peydakirina dadperweriyê kir.

Mutlu got ku 15’ê Hezîrana 1915’an yek ji dîrokên ku destpêka komkujî û koçberkirina bi zor a li dijî gelê Suryanî nîşan dide ye. Wî diyar kir ku di vê qonaxê de, ku di bîra gelê Suryanî de wek “Seyfo” tê nasîn, sed hezar kes hatin kuştin, ji welat û cihên xwe hatin derxistin û hebûna dîrokî ya gelê Suryanî hate armanckirin.

Mutlu got ku tevî derbasbûna 111 salan, êş û birînên wê demê hîn jî di bîranînan de sax in. Li gorî wî, heya ku rastî neyên eşkerekirin, dadperwerî neyê pêkanîn û berpirsiyariya dîrokî neyê pejirandin, ev êş dê ji nifşekê bo nifşeke din were veguhestin.

Wî diyar kir ku gelê Suryanî ne tenê daxwaza naskirina trajediyên dîrokî dike, lê herwiha dixwaze bi ziman, çand û baweriya xwe wek hemwelatiyên wekhev bijî. Mutlu got ku ev daxwaz bingehek sereke ya civaka demokratîk e.

Di daxuyaniyê de hate gotin ku li Mezopotamya û Anatoliyayê gel û bawerî bi sedsalan bi hev re jiyane û aştiya mayînde, demokratîkbûn û dadperweriya civakî tenê bi rûniştina bi rastiyên dîrokî re pêk tê.

DEM Partiyê diyar kir ku bi rêzdarî bîra wan kesan dike ku di Seyfoyê de jiyana xwe ji dest dan û careke din piştgiriya xwe ji daxwazên dadperwerî, rûniştina bi dîrokê re û hemwelatiya wekhev a gelê Suryanî re ragihand.