BANG LI ÎSTÎFAYÊ JI ÎPEKÊ YÊ KU JI DEM PARTIYÊ HAT DERXISTIN: ŞAREDARÎ YA GEL E

Li ber avahiya Şaredariya Qoserê (Qiziltepe), ji bo îstîfaya hevşaredarê Qoserê Zeyni Îpek, yê ku ji Partiya Wekhevî û Demokrasiya Gelan (DEM Partî) hatiye derxistin, daxuyaniyeke çapemeniyê ya girseyî hate dayîn. Parlamenterê DEM Partiyê yê Êlihê (Batman), Rüştü Tiryaki, ku beşdarî daxuyaniyê bû, got ku heta Îpek îstîfa neke, ew ê li ber şaredariyê çalakiyên xwe bidomînin.

Daxuyaniya ku ji aliyê Rêxistina Parêzgeha Mêrdînê ya DEM Partiyê ve hate organîzekirin, bi beşdariya parlamenterên DEM Partiyê, hevşaredarên şaredariyên herêmê, nûnerên partiyên siyasî û rêxistinên civaka sivîl, Dayikên Aştiyê û gelek welatiyan pêk hat. Girseyê ku li ber avahiya şaredariyê kom bû, pankarta “Gel deng da partiyê, neda bêaxlaqiyê” vekir û bi dirûşmeya “Rûreş îstîfa” ket baxçeyê şaredariyê.

Rüştü Tiryaki, cîgirê hevserokê giştî yê DEM Partiyê yê berpirsiyarê rêveberiyên herêmî û parlamenterê Êlihê, di daxuyaniya xwe de got ku divê şaredarî ji gel re bê vegerandin. Tiryaki bi bîrxistina hilbijartinên pêşîn anî ziman ku li gorî daxwaza gel li dijî Zeyni Îpek lêpirsîn hatiye destpêkirin û di encama lêpirsînê de biryara derxistina wî ji partiyê hatiye girtin. Wî got ku Îpek bi devjêbernedana karê xwe biryara gel nas nekiriye û wiha axivî: “Wî hilbijart ku kursiya şaredariyê bi dest bistîne. Wî rêz li biryara gel negirt.”

‘EM BI HÊSANÎ NEHATIN VÊ ASTÊ’

Tiryaki bal kişand ser vê yekê ku li pişt destkeftinên şaredariyan têkoşînek dirêj a demokrasiyê heye û got ku gel bi dayîna berdêlên mezin gihîştiye vê astê.

Tiryaki wiha got: “Li pişt van hilbijartinan têkoşîna 36 salan a gelên me ya demokrasiyê heye. Em ji çend serokatiyên şaredariyan heta sedan serokatiyên şaredariyan bi hêsanî nehatin. Gelên me ji bo vê yekê berdêlên mezin dan. Ji bilî siyasetmedarên ku têkoşîna demokrasiyê dimeşînin, serokên şaredariyan û parlamenterên me yên hilbijartî jî hîn di girtîgehan de tên girtin. Parlamenterên me hatin kuştin, hevalên me yên hilbijartî hatin kuştin. Yek ji hevalên me yên hatine kuştin parlamenterê me Mehmet Sincar e ku ji vê bajêr hatibû hilbijartin. Em bi gelê xwe re, bi dayîna berdêlên mezin, gihîştin vê derê.”

‘MA EW Ê BIKARIBIN LI BER GEL DERKEVIN?’

Tiryaki anî ziman ku tu post û makamek herdemî nîne û got ku windakirina hilbijartinekê an jî derketina siyasetmedarekî ji partiyê nayê wê wateyê ku têkoşîna demokratîk bi dawî dibe.

Tiryaki wiha got: “Kesê ku tê vê makamê, bila nefikire ku dê heta hetayê li vir bimîne. Em dikarin hilbijartinekê winda bikin. Kesekî hilbijartî dikare sibê ji vê partiyê îstîfa bike, dikare li vê partiyê xiyanetê bike. Lê heya ku serê me bilind û eniya me vekirî be, em ê careke din û careke din vê bajaran bi dest bixin. Lê gelo ew kesên ku îro xiyanetê li gelên me dikin, dê roja ku bê bikaribin li ber gel derkevin? Bawer bikin, gelê me dê heta silav jî nede wan.”

Tiryaki careke din bang li Zeyni Îpek kir ku îstîfa bike û got: “Ji bo tiştekî qet dereng nîne. Em îro careke din bangewaziya xwe dubare dikin. Em hêvî dikin ku wî bêyî ku rojek derbas bibe, ji karê xwe îstîfa bike.”

‘EM Ê XWEDÎ LI ŞAREDARIYA XWE DERKEVIN’

Tiryaki careke din destnîşan kir ku divê şaredarî ji gel re bê vegerandin û got ku ew ê protestoyên xwe bidomînin.

Wî wiha got: “Em ê li vir bimînin. Em ê li dijî vê neheqiyê, vê bêhiqûqiyê û vê dagirkirinê berdewam bikin û bibêjin bes e. Em ê her roj, her hefte, her meh, heta roja hilbijartinan an jî heta ku ew îstîfa bike, li ber vê şaredariyê bin. Şaredarî ya me ye, em ê xwedî li şaredariya xwe derkevin.”

Piştî daxuyaniyê, girse ket hundirê avahiya şaredariyê û heta jûreya karê Zeyni Îpek çû. Dayika Aştiyê Gurbet Tekin, ku li wir li ser navê girseyê axivî, bal kişand ser vê yekê ku şaredarî bi berdêlên ku gel daye hatine bidestxistin û bang li Îpek kir ku dev ji makamê berde.

Tekin got: “Ev makaman tu carî bêexlaqî û bêhiqûqiyê qebûl nakin. Ji ber vê yekê, divê ev kes tavilê vê makamê ji gel re bihêle. Wekî din, em ê her carê bi vî awayî bên vir. Heta ku ew vê makamê radestî gel neke, em ê li vir bimînin.”

Piştî axaftinê, girse bi dirûşmeya “Rûreş îstîfa” ji avahiyê derket û li baxçeyê şaredariyê rûniştinê pêk anî. Piştî çalakiya rûniştinê, protesto bi dawî bû.