JI BER BIKARANÎNA GOTINA «BIRÊZ ÖCALAN», AZADBÛNA ALÎ ADIMAN 6 SALAN HATE DERXISTIN

Hat ragihandin ku azadbûna girtiyê siyasî Alî Adiman, ku li Girtîgeha F ya Boluyê tê girtin, ji ber ku di daxwaznameyên xwe yên ji Wezareta Dadê re şandine de gotina «Birêz Öcalan» bikar aniye, 6 salan hatiye paşxistin. Parlamentera Partiya Wekhevî û Demokrasiyê ya Gelan (DEM Partî) ji Şirnexê, Newroz Uysal Aslan, diyar kir ku mafê azadiya vegotinê û mafê daxwaznameyê yên girtiyên siyasî di girtîgehan de bi cezayên dîsîplînê tên binpêkirin û mijar anî rojeva Meclîsê.

Newroz Uysal Aslan, parlamentera DEM Partî ya Şirnexê, pêşniyara pirsê pêşkêşî Meclîsê kir û xwest ku Wezîrê Dadê Akın Gürlek bersiva wê bide. Di pêşniyarê de hate gotin ku li dijî Alî Adiman, ku li Girtîgeha F ya Boluyê ye, ji ber bikaranîna gotina «Birêz Öcalan» di daxwaznameyên ji Wezareta Dadê re hatine şandin de, cezaên dîsîplînê yên hucreyê hatine sepandin û ev ceza bûne bingeha paşxistina azadbûna wî ji bo 6 salan.

Aslan pirsî ka cezakirina girtiyan û paşxistina azadbûna wan ji ber gotineke ku li gorî wê sûc pêk nayîne, li ser kîjan bingeha qanûnî hatiye kirin. Her wiha wê ev mijar anî rojevê ka gelo biryarên rêveberiyên girtîgehan dikarin ji destûr, qanûn û biryarên dadgehên bilind re pêşî bigirin an jî wan derbas bikin.

Di pêşniyarê de hate xwestin ku bê eşkerekirin, heta niha çend girtiyan tenê ji ber bikaranîna gotina «Birêz Öcalan» cezayê hucreyê girtiye, azadbûna çend kesan hatiye astengkirin û ji serîlêdanên li dijî van biryaran çend heb hatine encamdan.

Newroz Uysal Aslan diyar kir ku ev pêkanîn maf û azadiya girtiyan binpê dike û ji Wezareta Dadê xwest ku li ser vê mijarê ravekirinekê bide.