LI ROJHILATÊ KURDISTANÊ GREVA GIŞTÎ: LI BAJARAN BÊDENGÎ SERDEST E

Di salvegera çaremîn a serhildana “Jin, Jiyan, Azadî” de, ku piştî kuştina Jîna Emînî ji aliyê hêzên Îranê ve dest pê kir, li bajarên Rojhilatê Kurdistanê greva giştî hate lidarxistin. Li gorî agahiyan, bi bangewaziya Yekîtiya Hêzên Siyasî yên Rojhilatê Kurdistanê, li gelek bajaran, di nav de Sine, Bane, Pîranşar, Seqiz, Senendec û Mihabad, beşdariya gel di grevê de girîng bû.

Di çarçoveya grevê de dikan nehatin vekirin, bazaran nehatin danîn û li kolan, cadde û qadên giştî yên bajaran bêdengî serdest bû. Ev çalakî ji bo bîranîna kesên ku di dema şoreşê de jiyana xwe ji dest dane û nîşandana bertekên gel hat lidarxistin.

Hat ragihandin ku hêzên rejîma Îranê û Sepahên Pasdaran ji bo astengkirina grevê, li bajaran zext û tedbîrên ewlehiyê zêde kirine. Li gorî çavkaniyên herêmî, li hin bajaran girtin û êrîşên li ser malan hatine kirin.

ASTENG LI PÊŞBERÎ SERDANA GORISTANA JÎNA EMÎNÎ

Li Seqizê ji bo astengkirina serdanên ku hatibûn plan kirin bo Goristana Ayçî, ku gora Jîna Emînî lê ye, hat gotin ku ava Bendava Çirax Weys a li ser rê hatiye berdan.

Piştî vê pêşketinê hate ragihandin ku malbata Jîna Emînî û malbatên kesên ku di dema tevgera “Jin, Jiyan, Azadî” de jiyana xwe ji dest dane, nehatine destûrdayîn ku ji malên xwe derkevin.

LI MIHABADÊ TEDBÎRÊN EWLEHIYÊ ZÊDE BÛN

Çavkaniyên herêmî ragihandin ku li Mihabadê hêzên rejîma Îranê hejmareke mezin a personel û wesayîtên leşkerî li kolan û caddeyan bicih kirine. Her wiha hat gotin ku hebûna hêzên girêdayî Sepahên Pasdaranê yên Îranê li bajêr zêde bûye û tedbîrên ewlehiyê yên giran didomin.

Yekîtiya Hêzên Siyasî yên Rojhilatê Kurdistanê bangewaziya greva giştî li ser salvegera çaremîn a tevgera “Jin, Jiyan, Azadî” kiribû da ku kesên ku di şoreşê de jiyana xwe ji dest dane bên bîranîn û bertekên gel bên nîşandan.