TRUMP JI PEYMANA BEREVANIYA EREBISTANA SIÛDÎ-TIRKIYE-PAKISTANÊ RAZÎ YE

Serokê DY Donald Trump diyar kir ku ji peymana berevaniyê ya di navbera Erebistana Siûdî, Tirkiyeyê û Pakistanê de hatiye îmzekirin razî ye. Wî got ku ev peyman nîşan dide ku welatên Rojhilata Navîn li ser xweparastina bi bandortir û xurtkirina kapasîteyên ewlehiyê dixebitin.

Erebistana Siûdî, Tirkiye û Pakistan, wek hevalbendên Washingtonê li herêmê, di 7ê Tebaxê de li Erebistana Siûdî peymaneke berevaniyê îmze kirin. Peyman di demekê de hat îmzekirin ku şerê di navbera Îran û DY de berdewam dike û Erebistana Siûdî jî rastî êrîşan tê.

Trump di daxuyaniya xwe ya li ser hesabê Truth Social de derbarê peymanê de got: “Ev nîşan dide ku Rojhilata Navîn li hev tê û welat di dawiyê de dê bikaribin xwe bi awayekî bandortir biparêzin.”

Ji bo Erebistana Siûdî, yek ji sedemên sereke yên girîngiya peymana berevaniyê ew e ku welat ji aliyê Îranê ve wek bersiv li hember bombebaranên DY hat hedefgirtin.

Riyad di heman demê de bi zêdebûna dîsa ya pevçûnên bi Hûsiyan re li Yemenê jî rû bi rû ye. Tirkiye, Pakistan û Erebistana Siûdî jî di hewildanên dîplomatîk ên ji bo dawîkirina pevçûna di navbera Îran û DY de roleke hevpar dilîzin.

EWLEHIYA HERÊMÎ YA DY DIBE MIJARA NERÎNAN

Li gorî hin analîstan, peymana berevaniyê ya di navbera her sê welatan de di heman demê de nîşana kêm bûna baweriya Erebistana Siûdî, Tirkiyeyê û Pakistanê bi DY re ye.

Tê gotin ku Washington nikarîbû hevalbendên xwe yên li herêmê bi têra xwe ji êrîşên mûşekan û balafirên bêmirov ên Îranê û komên piştgiriya wê biparêze. Bi taybetî ku hemû êrîşên mûşekên balîstîk û İHAyan li dijî welatên Kendavê nehatin astengkirin, ev yek derbarê garantiyên ewlehiyê yên DY li herêmê de pirsên nû çêkir.

Ji ber vê yekê, hin çavdêran peymana nû ya berevaniyê wek parçeyek ji lêgerîna Erebistana Siûdî, Tirkiyeyê û Pakistanê ya ji bo xurtkirina kapasîteyên xwe yên berevaniyê û hêzdayîna hevalbendiyên herêmî dinirxînin.