BERÎ CIVÎNA TRUMP-ZELENSKİY, MOSKOVA BI ÊRÎŞÊN DRONAN HATE ARMANC KIRIN

Paytexta Rûsyayê, Moskova û derdora wê, di şevê de bûn armanca êrîşên berfireh ên bi dronan ku hate gotin ji aliyê Ukraynayê ve hatine kirin. Rayedarên Rûsyayê ragihandin ku zêdetirî 390 dron ber bi herêma Moskova ve hatine şandin.

Şaredarê Moskova Sergey Sobyanin di daxuyaniya xwe ya li ser Telegramê de got ku pergala parastina asmanî piraniya dronan berî ku bigihîjin paytextê hilweşand. Li gorî wî, 81 dron dema ku nêzîkî Moskova bûn hatin xistin.

Valiyê Herêma Moskova Andrey Vorobyov jî ragihand ku di encama êrîşan de hin mal û apartman zirar dîtin, lê li gorî agahiyên destpêkê tu kes jiyana xwe ji dest neda.

Ev êrîş demek kurt berî civîna girîng a Serokê Ukraynayê Volodimir Zelenskiy û Serokê Dewletên Yekbûyî Donald Trump li Washingtonê pêk hat. Tê payîn ku di civînê de şerê Ukraynayê, piştgiriya Amerîkayê ji Kîevê re û derfetên çareseriya dîplomatîk bên nîqaşkirin.

Di şerê ku nêzîkî çar sal û nîv e didome de, hewildanên dîplomatîk hêj encameke mayî derneanîne. Di dema dawî de jî hem Rûsya hem Ukrayna êrîşên xwe yên dûrhatî zêde kirine.

Zelenskiy berî civînê got ku hêvî dike Amerîka piştgiriya xwe bidomîne û li welatê wî “aştiya bi rûmet” pêk were.

Di heman demê de hate ragihandin ku piştî vegera Trump bo serokatiyê, Amerîka şandina rasterast a çekan bo Ukraynayê kêm kiriye, lê bernameya veguhastina çekên ku welatên Ewropayê dikirin bo Kîevê hîn jî piştgirî dike. Herwiha Washington piştgiriya xwe ya di warê agahdariyê û pergala Starlink de didomîne.

Li aliyê din, têkiliyên di navbera Moskova û Washingtonê de hîn jî gergîn in. Kremlin îdiayên li ser hewildanên agirbestê red kir, û Wezîrê Derve yê Rûsyayê Sergey Lavrov jî bang li Amerîkayê kir ku piştgiriya çekan ji Ukraynayê re rawestîne.