FERMANDARÊ PARASTINA HEWAYÎ YA IRAQÊ: HERÊMA ASMANÊ YA HERÊMA KURDISTANÊ DI BIN KONTROLA ME DE NÎNE

Endamê Komîsyona Ewlehî û Berevaniyê ya Parlamentoya Iraqê Diyar Mufti ragihand ku Fermandarê Parastina Hewayî ya Iraqê, Korgeneral Mühenned Esedi, di civîna komîsyonê de gotiye ku herêma asmanê ya Herêma Kurdistanê ne di bin kontrola Iraqê de ye û ji ber vê yekê nikarin ew herêma asmanî biparêzin.

Li gorî Diyar Mufti, Korgeneral Esedi di civînê de gotiye: “Herêma asmanê ya Herêma Kurdistanê ne di bin kontrola me de ye û destûr nayê dayîn ku em wê biparêzin.”

Mufti diyar kir ku ji destpêka pevçûnên di navbera Dewletên Yekbûyî, Îsraîl û Îranê de di 28’ê Sibatê de, Herêma Kurdistanê rastî 929 êrişên fuzeyî û balafirên bêmirov hatine. Di van êrişan de 32 kes jiyana xwe ji dest dane û 147 kes jî birîndar bûne.

Wî her weha got ku ji ber metirsiya ewlehiyê, hin şirketên navneteweyî yên petrolê çalakiyên xwe li Herêma Kurdistanê rawestandine. Ji bo parastina zeviyên petrolê jî ji hukûmeta Iraqê daxwaza pergala parastina hewayî hatiye kirin.

Di aliyekî din de, Axêverê Hikûmeta Iraqê Haydar Abudi di 22’ê Tîrmehê de ragihand ku Serokwezîr bi şirketên petrolê re civiyan kiriye û ji bo destpêkirina dîsa ya çalakiyên wan temînat daye.

Mufti her wiha got ku Fermandarê Parastina Hewayî ya Iraqê ji parlamentoyê daxwaz kiriye ku budceya pêwîst ji bo xurtkirina pergala parastina hewayî were peydakirin.

Li gorî Mufti, teslîmkirina pergala parastina hewayî ya navîn-menzîl Cheongung-II (M-SAM 2), ku Iraq ji Koreya Başûr kirrîye, diviyabû vê salê pêk were. Lê ji ber pirsgirêkên darayî, teslîmkirin dereng maye. Wî got ku yekem pere hat dayîn, lê ji ber ku qîsta duyemîn hîn nehatiye dayîn, teslîmkirin nehatiye kirin.

Iraq di Hezîrana 2023’an de bi şirketa Koreya Başûr LIG Nex1 re peymaneke nêzîkî 2,78 milyar dolarî ji bo kirîna pergala Cheongung-II îmze kiribû. Armanc ew e ku ev pergala nû kapasîteya parastina hewayî ya Iraqê bi awayekî girîng zêde bike.