LI SÎNORA IRAQÊ ŞANDINA MEZIN A ÇEKAN KU TÊ GOTIN BO HIZBULLAHÊ BÛ HATE ASTENGKIRIN

Wezareta Karên Hundirîn a Sûriyeyê ragihand ku di operasyonake ewlehiyê de li nêzî sînorê Iraqê şandineke mezin a çekan hate girtin. Di nav çekan de dron, fuzeyên dûrber û fuzeyên dijî tankan jî hebûn. Wezaretê got ku nîşaneyên destpêkê diyar dikin ku armanc ew bû ku ev çek bi rêya Sûriyeyê bigihîjin Hizbullah li Lubnanê.

Li gorî daxuyaniya wezaretê, yekîneyên taybet ên ewlehiyê li ser sînorê Sûriye û Iraqê otomobîlek ku bi awayekî gumanbar rawestiyabû kontrol kirin. Di lêgerînê de fuzeyên dûrber, fuzeyên dijî tankan, dron û gelek cûreyên din ên cebilxaneyê hatin dîtin.

Lêkolînên destpêkê nîşan didin ku plan ew bû ku ev çek bi rêya Sûriyeyê veguhezînin Lubnanê û ji wir bigihîjin Hizbullah. Wezaretê got ku lêpirsîn ji bo nasandina berpirsan û torên piştgirîker berdewam e.

Di daxuyanîyê de hate bibîranîn ku di dema desthilatdariya Beşşar Esed de Îran ji axa Sûriyeyê wek rêya lojîstîkî ji bo şandina çekan bo Hizbullahê bikar dianî, û deriyên Elbu Kemal û El-Qaim di vê rêyê de roleke bingehîn hebû.

Wezaretê diyar kir ku piştî hilweşîna rejîma Esed vê rêya lojîstîkî bi piranî hate qutkirin, lê hewildanên qaçaxçiya çekan hîn jî berdewam in û hêzên ewlehiyê li hember wan operasyonan didomînin.

Her wiha hate ragihandin ku di mehên borî de li Talkalakh, El-Amiriye û El-Qusayr jî gelek operasyon hatin kirin û roket, çekên giran û cebilxaneyên cuda hatin girtin.

Wezareta Karên Hundirîn di daxuyaniya xwe ya dawiyê de dubare kir ku destûr nede ku axa Sûriyeyê bibe rêya qaçaxçiya çekan an jî bingehek ji bo êrîşan, û got ku ew ê li hember her çalakiyeke ku ewlehiya Sûriyeyê û welatên cîran dixe xeterê tedbîrên pêwîst bigire.