TRUMP DERBARÊ TENGAVA HURMUZÊ DE AXIVÎ: “DI HEFTA PÊŞ DE DIBE KU LIHEVHATIYEK WERE PÊKANÎN”

Serokê Dewletên Yekbûyî Donald Trump derbarê pêşveçûnên li dora Tengava Hurmuzê de got ku di rojên pêş de dibe ku gavên dîplomatîk ên girîng werin avêtin. Di dema ku tansiyona navbera ABD û Îranê dewam dike, Trump got ku ihtîmala gihîştina lihevhatinekê li ser Tengava Hurmuzê heye.

Trump di axaftina xwe ya ji NBC News re de got ku di hefteya pêş de dibe ku pêşveçûnên erênî çêbibin û diyar kir ku rêveberiya Washingtonê ji bo danûstandinên dîplomatîk amade ye.

Wî got ku lihevhatinek li ser Tengava Hurmuzê dikare pêk were, lêbelê li ser naverok û çarçoveya wê ti agahiyên zêdetir neda. Lê daxuyaniyên wî wekî nîşaneyên hewildanên nû yên ji bo kêmkirina tansiyonê li vê rêya girîng a bazirganiya enerjiyê ya cîhanê hatin şîrovekirin.

Axaftinên Trump piştî nirxandinên dawî yên Pentagonê derbarê Îranê de hatin. Berê Wezîrê Parastinê yê Amerîkayê Pete Hegseth îdia kiribû ku Îranê li dora Tengava Hurmuzê mayîn danîne, lê paşê ew rakiribûn.

Li gorî nûçeyên medyayê Amerîkayê, dezgehên îstixbaratê yên ABD çalakiyên leşkerî û amadekariyên Îranê li herêmê bi baldarî dişopînin.

Trump jî ji dayîna agahiyên zêdetir xwe parast û got: “Ez naxwazim li ser vê mijarê biaxivim. Lê di hefteya pêş de dibe ku pêşveçûnên pir girîng çêbibin.”

Ev daxuyaniyên Trump di demekê de hatin ku hêviyên derbarê têkiliyên dîplomatîk yên nû yên navbera Washington û Tahranê de dîsa zêde bûne.