WELATIYÊN AMEDÊ: JI BO PÊŞVEÇÛNA PÊVAJOYÊ AZADIYA RÊBER APO Û GAVÊN PRAKTÎK PÊWÎST IN

Welatiyên Amedê diyar kirin ku ji bo pêşveçûna Pêvajoya Civaka Demokratîk û Aştiyê divê azadiya fizîkî ya Rêber Apo were misoger kirin, girtiyên siyasî werin berdan û dewlet gavên pratîk ji bo aştiya mayînde bavêje.

Wan bîranîn ku pêvajo bi bangewaziya Rêber Apo dest pê kiriye û nêzîkî sal û nîvekê ye didome. Li gorî wan, tevî gavên ku Tevgera Azadiya Kurdistanê avêtine, hê jî rêkûpêkên qanûnî û siyasî yên hatine bendê ji aliyê dewletê ve nehatiye pêkanîn. Wan got ku ji bo pêşveçûna pêvajoyê divê gavên pratîk ku baweriyê xurt dikin werin avêtin.

Muzaffer Hocaoğlu, ku ji ANF re axivî, got hêviya wan a herî mezin bidawîbûna şer e. Wî diyar kir ku dixwazin pêvajo di bin rêberiya Abdullah Öcalan de bi awayekî aştiyane biqede û dewlet di warê azadiyan de gavên pêwîst bavêje û çavkaniyan ji şer ber bi pêşketina civakê ve were bikaranîn.

Edîbe Eren jî got ku gelê Kurd aştiyê dixwaze û daxwaz kir ku Rêber Apo azad bibe û hemû girtiyên siyasî yên di zindanan de bên berdan. Wê hêvîya destpêkirina serdemeke nû ya li ser bingeha aştiyê, biratiyê û wekheviyê anî ziman.

Firgan Yildiz jî got ku ji bo bidestxistina aştiya mayînde divê hemû girtiyên siyasî werin berdan. Wî bal kişand ser girîngiya peydakirinê şertên dermankirinê ji bo girtiyên nexweş û got bê azadiya girtiyan çareseriya mayînde ne mimkûn e.

Vedat Özer jî got divê dewlet bi awayekî xurtir xwedî li pêvajoyê derkeve û gelê Kurd, bi taybetî ciwanan, bang kir ku piştgirî bidin vê pêvajoyê. Wî diyar kir ku divê gavên hatine avêtin bi îradeya hevbeş bên pêşxistin û got azadiya Rêber Apo daxwazeke girîng a gelê Kurd e.