TRUMP LI SER BERSIVA ÎRANÊ HÊRS BÛ: “EV BERSIV BI TEMAMÎ NEQEBÛLKIRÎ YE”

Serokê Dewletên Yekbûyî yên Amerîkayê Donald Trump, bersiva Îranê ya li hemberî pêşniyara Washingtonê ya ji bo dawîkirina şerê rexne kir û got ku ev bersiv “bi temamî neqebûlkirî ye.”

Trump di platforma Truth Social de daxuyaniyek kir û got ku bersiva berpirsên Îranê xwendiye. Wî got, “Ez ji vê bersivê razî nebûm. Ev bi temamî neqebûlkirî ye.”

Di peyameke din de Trump, Îran tawanbar kir ku bi salan Amerîka û civaka navneteweyî dixapîne. Wî got ku Îranê nêzîkî 50 salan bi Washingtonê re henek kiriye û got, “Wan bi welatê me henek kir, lê êdî dê gelek dirêj nekenin.”

Di heman demê de Cîgirê Wezîrê Derve yê Îranê Kazim Garibabadi, li dijî plana Fransa û Brîtanyayê ya şandina hêzên leşkerî bo Tengava Hürmüzê daxuyaniyên tund kir.

Garibabadi got ku artêşa Îranê dê li hemberî her cûre bicihbûna leşkerî ya muhtemel “bi biryar û zû” bersivê bide. Wî diyar kir ku ewlehîya Tengava Hürmüzê tenê ji aliyê Komara Îslamî ya Îranê ve dikare were parastin.

Li gorî nûçeyên medyayên navneteweyî, Paris û Londonê li ser avakirina koalîsyonek navneteweyî ji bo ewlehîya Tengava Hürmüzê piştî peymaneke muhtemel a navbera Amerîka û Îranê dixebitin.

Serokkomarê Fransa Emmanuel Macron jî li Nairobiyê daxuyand ku Fransa tu carî bicihbûna leşkerî li Tengava Hürmüzê nexe nav rojeva xwe. Macron got ku nêzîkatiya Fransa di çarçoveya “mîsyoneke ewlehiyê ya bi hevkariya Îranê” de ye.

Serokwezîrê Îsraîlê Binyamin Netanyahu jî di hevpeyvînekê de bi kanala CBS re got ku şerê li dijî Îranê hêj bi dawî nebûye. Netanyahu got ku divê stokên uranyuma zenginleştirî ya Îranê werin derxistin û hin tesîsên nukleerî werin rakirin.

Hikûmeta Brîtanyayê jî daxuyand ku wezîrên berevaniyê yên Fransa û Brîtanyayê dê roja Sêşemê civîneke online bi welatên ku dikarin piştgirî bidin ewlehîya Tengava Hürmüzê re lidar bixin.