SEROKWEZÎRÊ IRAQÊ ZEYDÎ: TÊKOŞÎNA LI DIJÎ GENDALIYÊ TÊ DESTPÊKIRIN, TU KES NE PARASTIYE

Serokwezîrê Iraqê Ali Falih Zeydî ragihand ku kampanyaya hikûmetê ya li dijî gendalî tenê qonaxa yekem e û kesên ku pereyên gel bi awayekî neqanûnî xerc kirine bê ceza nahêlin. Di civîna Encûmena Wezîran de herwiha biryar hate dayîn ku ji şirketên biyanî yên petrolê bacê sedî 35 were standin û gelek projeyên mezin ên xanî û elektrîkê jî hatin pejirandin.

Di civîna heştemîn a asayî ya Encûmena Wezîran de rewşa aborî, siyaseta enerjiyê, pergala bacê û projeyên bingehîn hatin nirxandin.

Zeydî di axaftina xwe de got ku şerê li dijî gendalî yek ji armancên sereke yên hikûmetê ye û pereyên gel dê dîsa ji bo xizmeta welatiyan werin bikaranîn.

Wî diyar kir ku li hember kesên ku di dezgehên dewletê de gendalî dikin tu nermî nayê nîşandan û daxwaz kir ku hemû dosyeyên gendalî û kêmasiyan rasterast ji hikûmetê re werin şandin. Wî got ku li hember berpirsan tedbîrên qanûnî dê bêne girtin.

Di warê enerjiyê de jî Zeydî ragihand ku di sala bê de ji bo sektora elektrîkê budceyek mezintir dê were veqetandin. Armanc ew e ku di vê salê de peymanên projeyên ku 25 hezar megawat elektrîkê hilberînin werin temamkirin.

Encûmena Wezîran herwiha projeya stratejîk a dabeşkirina milyonek parçeyên erdê ji bo avakirina xanî li hemû parêzgehên Iraqê (ji bilî Herêma Kurdistanê) pejirand. Ji bo rêvebirina projeyê komîteyek bilind hate damezrandin.

Li gor biryarên nû, hemû şirketên biyanî yên petrolê û şirketên peymankar dê li gor Yasaya Bacê ya Dahatê bacê sedî 35 bidin.

Di heman demê de zanîngeh û enstîtuyên taybet jî ketin bin berpirsiyariya dayîna bacê. Ji bo wan saziyên ku di demê diyarkirî de bacê bidin, di cezayên derengmayînê de hêsankariyên qanûnî dê werin pêşkêşkirin.