PEYAMA JI ÇIYAYÊN KURDISTANÊ BO CIVÎNA 39. A NAVNETEWEYÎ YA JINAN

Civîna 39. a Navneteweyî ya Jinan li bajarê Córdoba yê Arjantînê dest pê kir. Bi hezaran jinên ji herêmên cuda yên Abya Yala hatin cem hev. Di vekirina vê çalakiya ku sê roj berdewam dike de, peyameke vîdyoyî ya ji çiyayên Kurdistanê hatibû şandin, ji beşdaran re hate nîşandan.

Di vê civînê de jin dê serpêhatiyên xwe parve bikin û stratejiyên pêşxistina têkoşîna hevpar nîqaş bikin. Civîn dê bi civînên cuda û çalakiyên cihêreng berdewam bike.

Berî destpêkirina vekirinê, endamên Tevgera Jinên Kurd beşdaran silav kirin û silavên xwe ji bo Rêber Apo yê di girtîgehê de ye şandin. Piştre peyama vîdyoyî ya ji çiyayên Kurdistanê hatibû şandin, hate nîşandan.

Heval Zîlan Vejîn, ku li ser navê KJAR û Tevgera Jinên Kurd axivî, silavên xwe ji bo civînê şandin û girîngiya têkoşîna hevpar a jinan anî ziman. Vejîn tekez kir ku felsefeya Rêber Apo ji bo gelên cîhanê û jinan bersivekê pêşkêş dike.

Beşdaran peyama vîdyoyê bi coş pêşwazî kirin û di çalakiyê de dirûşmeya “Jin, jiyan, azadî” hate qîrîn.

Di destpêka civînê de, merasîmek li gorî kevneşopiyên gelên xwecihî yên cuda yên Abya Yala jî hate lidarxistin. Di du rojên pêş de, atolyeyên cuda, pêşandan, nîşandana fîlman û çalakiyên cihêreng dê bên lidarxistin.

Di civînê de jinên ku nûneratiya tevgerên cuda yên femînîst dikin, di nav de tevgerên gelên xwecihî jî, beşdar dibin. Ev civîn ji bo parvekirina serpêhatiyan û nîqaşkirina rêyên pêşxistina têkoşîna hevpar zemînekê peyda dike.