MAZLÛM EBDÎ: PÊVAJOYA ENTEGRASYONÊ GIHÎŞTIYE QONAXA DAWÎ, HEWLDANÊN SABOTAJÊ NEHATIN QEBÛLKIRIN

Şêwirmendê Serokatiya Komara Sûriyê, Mazlûm Ebdî, diyar kir ku pêvajoya entegrasyonê gihîştiye qonaxên dawî û got ku hewldanên sabote kirina vê pêvajoyê nayên qebûlkirin. Ebdî bang li xurtkirina yekîtiyê û xebata hevpar li herêmê kir.

Mazlûm Ebdî bi hin şêniyên bajarê Dirbêsiyê yê Rojava re civiya. Di civînê de, pêşketinên di qonaxa heyî de û astengiyên ku herêm pê re rû bi rû ye, hatin nîqaşkirin.

Ebdî got ku qonaxa heyî hewce dike ku hewldan bên yekgirtin û xebatên hevpar bên xurtkirin. Wî girîngiya serkeftina pêvajoya entegrasyonê û parastina destkeftiyên ku di encama zêdetirî 15 salan têkoşînê de hatine bidestxistin, tekez kir.

Ebdî diyar kir ku entegrasyon ne tenê aliyekî taybet, lê hemû pêkhateyên civakî yên herêmê, bi taybetî Kurd, Ereb, Suryan, Asûrî û Ermeniyan, dihewîne. Wî got ku hemû karmendên saziyên Rêveberiya Xweser jî di vê pêvajoyê de cih digirin. Li gorî gotina wî, armanca bingehîn a pêvajoyê ew e ku nûnertiya hemû pêkhateyan di saziyên dewletê de were misoger kirin.

“Hewldanên sabote kirina pêvajoya entegrasyonê nayên qebûlkirin”

Ebdî di derbarê xwepêşandanan de jî axivî û got ku lidarxistina xwepêşandanên aştiyane mafekî rewa yê her kesî ye û divê dewlet daxwazên welatiyan li ber çavan bigire.

Lê belê, wî tekez kir ku kiryarên provokatîf, hewldanên astengkirina pêvajoya entegrasyonê ya ku gihîştiye qonaxên dawî û gavên ku ji bo sabote kirina wê tên avêtin, nayên qebûlkirin.

Ebdî bang li hemû pêkhateyên herêmê kir ku bi yekîtiyê tevbigere, piştgirî bidin xebatên ji bo xebitandina saziyên dewletê yên li parêzgehê û li hember hewldanên ku cudahî û perçebûnê pêş dixin, rawestin. Wî got ku helwestên ku hewl didin herêmê ber bi cudahiyê ve bibin, ji berjewendiyên neteweyî û pêşeroja herêmê re xizmetê nakin.

Di dawiya civînê de, Ebdî bang li malbatan kir ku zarokên xwe teşwîq bikin biçin dibistanê û piştgiriyê bidin fêrbûna zimanê Kurdî ligel zimanê Erebî. Wî her wiha girîngiya parastina zimanê zikmakî û xurtkirina rola wî di perwerdeyê de anî ziman.